Sunday, December 27, 2015

煩豬一隻

今早煮 French toast 給小豬做早餐。見有時間就整得靚少少啦,加糖霜加草莓。

誰知條麻煩友耍手擰頭:「我唔要咁!我唔要 cheese 喺上面!我唔要咁!」

〔怒〕

我解釋白色那些不是 cheese,沒用。(他本身是喜歡 cheese 的,食 pasta 要放好多在上面。)(草莓他不喜歡,我是有私心想他食的。)

平時煮都是趕頭趕命,小豬更是不停在旁邊問:「得未啊媽媽煮好未啊媽媽食得未啊媽媽⋯⋯」所以一煮好就馬上給他食,加 maple syrup 就算。而小豬這種人就是,有樣野做開係咁,就永遠係咁,係一個唔中意變化的人!!所以他接受唔到個 French toast 唔同左樣!!

唉。

好在還有兩塊我未加任何野,其實我心底裏都知知地啦⋯⋯

Tuesday, December 22, 2015

Be My Eyes

上星期從 NPR 得知一個叫「Be My Eyes」的 app,我有種從沙發跳起的感覺:這個 app 實在太好了吧!馬上裝左(和 signed up)!

這是一個幫助盲人的 app。(從這裡可以看 NPR 的報導。)

作為一個正常視力的人,你可以想像盲人的世界嘛?可以想像他們每日可能會遇到的挑戰嘛?可能對我們來說簡單到不得了的事,對盲人來說就是沒可能做得到。

Be My Eyes」就是「作我的眼睛」,這個 app connects 盲人與正常視力的人,透過 video chat 幫助盲人「看」。(通常是幫助他們分辨一些物件,不會很久。)真的是簡單又實用!


現時有這麼多人 signed up。

當然是需要大量的 sighted people 才做得到啦。裝前我都有一刻的遲疑,怕自己沒空接聽⋯⋯ 但,做得到就做囉,不用想得太複雜。(如果你收到 call 但沒空,不用擔心,會 call 另一個人。)

App 裡面有 video 講解。好簡單的!

有好多種語言可以揀。我比較不滿意的是,只有「中文」一種!我寫了信給他們反映,希望可以分普通話和廣東話。

我裝左已經一個星期了,但還未收過任何 call。他們說第一個 call 可能要幾個星期。同埋,應該不會日日 call 你啦。哈哈。

好想這個 app 廣傳出去!!

#BeMyEyes

Thursday, December 17, 2015

Sleeping Beast



His favorite sleeping position. 

Tuesday, December 15, 2015



今日去 Academy of Sciences 有(假)雪啊!小豬大部分時間都是傻傻地站著不知所措。〔汗〕



有 reindeers,但它們都睡著了⋯⋯

最後的秋意。


上個星期的。

那時我倆都未病好,但好想出街啊。本來我是想去戶內的,因為那天好冷和微雨。但有人堅持要去公園!

好開心還能見到一點秋色。

見到好大的樹幹,平時驚驚青青的小豬,居然不用我扶自己走上去。我話想影相他居然很合作擺 poses!(!)(燒壞腦?!)


Sunday, December 13, 2015

行沙發。


我諗正常既小朋友都應該中意爬上爬落啩?但小豬真係從來唔會,因為佢好驚青。

最近爸爸常日鼓勵佢爬沙發。(媽媽唔係好 approve 但諗到小豬既情況⋯⋯)今日搭左個「橋」俾小豬行。只有四寸寬既縫隙小豬都好驚唔敢過!!〔汗〕(唉,所以佢唔中意 playground,樣樣野都唔敢玩!)後來經亞爸媽不斷鼓勵不斷保證如果跌會接住佢;又由爸爸示範一次,佢先敢踏過那四寸縫隙!!

雖然低能,但對小豬來講係好大 accomplishment 啊!!後來佢又行左幾次,個樣好 proud。

Saturday, December 12, 2015

哇~~~ 係過去個半月小豬高左一寸啊!!可喜可賀!!

Wednesday, December 9, 2015

是日新招。不想睡覺的小孩。

「我唔中意媽媽大聲講嘢~~~ 媽媽唔好大聲講嘢~~~」邊講邊哭!!!

亞仔,如果你唔激嬲媽媽,媽媽又點會大聲講嘢?!家陣明明係亞媽嬲緊喎⋯⋯

其實我係好嬲咁同佢鬥纏緊⋯⋯ 因為每逢接近睡覺時候他就開始拖延時間,又呢樣又嗰樣,煩到爆炸。如果唔惡少少佢既要求係唔會停㗎!

(後來梗係要安慰返佢囉乜世界… …)

+

做完睡覺 routine,媽媽係時候離場了。唔肯。拖手。鬥纏一番,終於肯 kiss。站著 kiss and hug 完到躺著 kiss,然後再要飛吻,要雙手嗰喔。沒問題,次次都要做。但就在我站在門口飛吻時,(因為要飛吻好多次⋯⋯)他也已經飛吻了我啦⋯⋯ 點解會忽然話「我好驚啊我好驚啊~~」

樣子又真係好驚,媽媽心軟。又鬥纏一番。拖手。理論。

如果他肯睡我真的可以陪他的,但他明明就是非常睏,但整個過程沒有合過眼啊!對眼碌到好大,想怎樣呢。

我說:「你要媽媽拖手都可以,但你要咪埋眼。」

「我好驚!」

「你驚乜嘢?!」

「我驚咪埋眼~~~」

驚。咪。埋。眼。!!!!!!!

Ohh well。

What can I say。

完全發現自己中伏。等亞媽剛才還有點內疚以為係自己有錯令到亞仔失去安全感⋯⋯

亞仔,你唔係驚咪埋眼,你係唔。想。咪。埋。眼。!!!

喺嗰刻開始我知道自己要儘快閃!如果唔係條友唔洗瞓㗎啦。

(後來拖多陣手我非要走佢哭左兩聲咪又冇事囉… … 不過我走後都死睜著眼半小時… …)

+

我想講,一個正常人係無法想像到一個唔中意睡覺既小孩係幾令人頭痛!!無論我同人講幾多,我發現其實他們都係唔明,或低估個可怕性。有時我都講到覺得自己 sounds like 把事情嚴重化。我想每個小孩點都有些日子係唔多願意睡覺吧?(如果你既小孩冇,你真係唔知自己幾咁幸福。)請想像每一日都係咁!!

係一種精神上的折磨,我只可以咁講。

Monday, December 7, 2015

爸爸讓小豬玩在沙發上行走;還叫我來看。看後我給一個 disapprove 的 look 就行開了。

然後小豬對爸爸說:「你唔好俾佢玩呢啲啦!」

爸爸還以為自己聽唔到,問我有沒有這樣說。我明明站得很遠一句聲都沒有出囉。

唔可以食㗎!

小豬咳得好犀利,我就跟他說,咳咳就不要吃朱古力啦。(因為他愛朱古力所以好些餅餅都有朱古力味的。)然後他每次食野都問我,病病可唔可以食呢個啊?病病可唔可以食嗰個啊?有時還會問病病可唔可做呢樣嘢?

到婆婆公公家。公公(知道他喜歡朱古力)給他一塊朱古力,他說:「病病唔可以食朱古力㗎!」(雖然當時我並不在場。)公公不停遊說食一塊唔緊要,(好壞的公公!)但小豬堅持話唔可以食㗎!

但他超愛朱古力啊!這是點我倒是估他唔到。真的好乖幾日都唔食朱古力。

(我與小豬病左好久了~~~ 好慘呀~~~)

Thursday, December 3, 2015

蓋被

同小豬玩 activity book,有版有 Elmo 睡在床上的畫面。

小豬:「Elmo 咕咕豬有蓋被被㗎。」

我:「係啊,個個小朋友咕咕豬都蓋被被㗎⋯⋯ 得邊個唔蓋被被㗎?」

小豬:「Baby!」

我:「嗯⋯⋯ 可唔可以唔蓋被被㗎?」

小豬搖頭:「唔可以。」

頓一頓,又說:「媽媽走左 Elmo 唔會踢走張被㗎!」

我:「咁邊個踢走張被㗎?」

小豬:「Baby 囉。」

我:「啱唔啱?」

小豬:「唔啱。」

+

不過,「知道啱唔啱」同「會唔會做」實屬兩回事。

嚇死我咩~~

大聲話小豬。

小豬:「媽媽你想嚇死我咩~~咁大聲~~」然後成個人企圖挨落我度。

我:「⋯⋯」

小豬:「我好驚驚啊~~~你唔好咁大聲啦~~」

我:「媽媽家陣係話緊你!梗係大聲啦!」

小豬:「但我好驚驚啊~~~」

我:「⋯⋯」


其實我唔係真係好大聲咋~~

Tuesday, December 1, 2015

病。

媽媽病了,爸爸幫(下)手煮飯。

小豬見到爸爸洗米,對爸爸說:「點解爸爸學媽媽洗米既?」

爸媽在廚房,小豬走來叫爸爸陪他玩;爸爸說要幫媽媽洗菜哦。

小豬:「以前都係得媽媽一個人煮飯㗎⋯⋯」

!!!!!!

+

又,當媽媽病時係咪註定個小朋友都會病呢?有沒有可避免的方法呢?

今日小豬全日沒停過跑來跑去,我沒有想過他病了。但男人說他雙眼皮都出左來了,一定是發燒啦。探下熱,居然有100.8F!但他完全沒有病徵囉,一直玩個不停。


死都要咁著。

~__~

Monday, November 30, 2015

反省

給新書小豬,他看了兩眼就說:「唔要。要第二本。」後來給了他三本,都不合他心意。扭計。(因為沒有午睡,所以變了小魔怪。)

+

好後來跟他一起看書,書中有個(動物)媽媽和一個小朋友,媽媽拿著書。

我說:「嗯,媽媽同 baby 一齊睇書喔。」

小豬:「佢哋睇緊乜嘢書啊?」

我:「唔知喔⋯⋯」

小豬:「個 baby 冇話我唔要睇呢本書我唔要睇呢本書~~~」

我(馬上醒起之前他扭計有咁講過):「係啊,佢冇咁講㗎⋯⋯ 」

小豬:「媽媽話睇呢本佢就睇呢本⋯⋯」

我:「係㗎。」

小豬:「佢冇話我唔要睇呢本啊~」

我:「嗯,咁講啱唔啱㗎?」

小豬非常認真望著我:「唔啱。唔可以咁㗎。」

+

好喜歡小豬這點。Reflective;是非分明。畢竟我也是個喜歡講道理的人,這樣以後大家才好相處吧!(!)

Monday, November 23, 2015

《The Leftovers》

唔知有沒有人睇緊《The Leftovers》呢?!我覺得最近呢兩集好好睇啊~~~ 但還有兩集就玩完,而聽(男人)講好似應該沒有第三季了,收視率低呀。加上昨晚那集,播完後應該又失左好多觀眾… … 但我中意呀。

整體來講,我覺得第二季非常《Lost》feel。(冇錯,同一個 creator!)第一季是跟同名的書拍的,我反而麻麻地,有時會跟男人望兩眼。(因為男人睇過本書所以想睇。)加上那時已經播完男人先開始睇,所以冇咁多時間追。今季同步睇,覺得比較跟得上。同埋今季個 style 完全唔同左。聽(男人)講,劇情也完全同本書無關了。

其實很奇怪,我本身應該係唔中意呢類題材的,但同《Lost》一樣,給我一種很奇怪的吸引力。我對呢種吸引力非常好奇。哈哈。

+

又,男主角 Justin Theroux 係 Jennifer Aniston 既(新!)老公啊。真係幾型架。佢都係《Mulholland Drive》既男主角(?),但真係冇印象。(又,Aniston 係佢第一任妻子!!)

Thursday, November 19, 2015

「黃」冠

小豬:「呢個係個皇冠唻㗎。」指著書裡面的皇冠。

我:「係啊。」

小豬:「嗱,個冠係黃色,所以咪係黃冠囉。」

Then he gave me a matter-of-fact look。

我:「又係喔⋯⋯」

Monday, November 16, 2015

Mini Trip 四星期後

在過去的一個星期裡感覺小豬的睡眠漸漸恢復正常了。雖然個幾星期前開始病,睡覺時還咳了幾晚,但一直都再沒有 night wakes 了。〔fingers crossed〕

不過,「媽媽拖手」也成為 sleep routine 之一。開始時我知道那只是他的延遲之計,拖完手又要拖,拖完又要拖。不過現在他都很合作了,真的拖「五分鐘」*,完了就完了,要同媽媽 kiss say good night。之前也試過我走後會哭兩聲,不過現在也不會了。會自己同自己講:「媽媽走左唔會返來㗎。」(因為我跟他說:你哭都沒用哦,媽媽也不會返來。那何必呢。)

另一樣奇怪的是,以前小豬每星期都會 skip 至少一次午睡的,但回來後沒有試過喔。這又有點意想不到的好事。可能,這陣子他真的是缺乏睡眠吧。


* 我說拖「五分鐘」,事實分幾鐘我就話「叮叮叮夠鐘囉。」

Saturday, November 14, 2015

玩嘢

與小豬準備午睡,忘記發生甚麼事,我問:「你係咪玩嘢啊?!」

他抬頭惘然望著我。

「你係咪玩嘢?!」雖然知道他不懂甚麼是「玩嘢」。

他答:「好。」

我:「好?好乜嘢?」

「我要玩嘢啊。」

「哈哈哈哈哈哈」我狂笑,「媽媽係話你唔好玩嘢,唔係問你玩唔玩嘢啊。」(!)

「我想玩啲嘢啊⋯⋯」在準備睡覺時忽然聽到有嘢玩當然不會輕易放過的小豬面露非常期待⋯⋯

然後不停講:「我想玩啲嘢啊⋯⋯ 我想玩啲嘢啊⋯⋯ 我想玩啲嘢啊⋯⋯ 我想玩啲嘢啊⋯⋯」

這時我才知道自己玩大左⋯⋯

Friday, November 13, 2015

牙尖嘴利

食晚飯時,有人大聲宣告:「我大個仔啦~我唔食 mum mum 啦~~」

爸媽食,他自己玩。

期間媽媽問他要唔要食,答:「我乜嘢都唔食。」

+

將某玩具搞到成地都係又唔執。媽媽嬲嬲豬:「你再係咁我收埋佢你唔好玩喇!」

叫極都唔肯執,(因為要準備睡覺)媽媽唯有自己來:「好啦,你以後唔好玩呢個啦⋯⋯」

馬上跑來幫手。但媽媽仍好嬲。執完後媽媽說:「我收埋呢個,你以後唔好玩啦。」

「下?!我好乖囉喔!」用非常無辜的樣子望住我。

「⋯⋯」

驚人發現

近來有個驚人發現。(!)

自從小豬約兩歲不再用睡袋後,他就從沒蓋過被子。他的床仔是常備被子的,我也幾乎日日都企圖讓他蓋。但他是連被子碰到他的腳都會踢開。之前天氣不冷,他房間會開暖氣,著多幾件衫,是可以的。但我也知道,冬天一定唔得,不會夠暖。其實這段日子也一直物色緊只是不易找到合我心意的。

然後上星期忽然間就轉涼了⋯⋯ 所以小豬就涷親了。

其實見天氣一變我就想著 order Gap 的一件鬆身包腳的 one piece。(其實已經留意了很久⋯⋯)但當我正要買時我見到 info 寫著:
「For child's safety, garment should be flame resistant or snug fitting. This garment is flame resistant.」

甚麼?!?!

我不想要「flame resistant」啊!因為 flame resistant 的 chemical 對人體有害。

美國有個很奇怪的法例,小童睡衣需要「flame resistant」,不易著火。但好端端睡衣為甚麼會著火?

(聽說是煙草公司搞出來的,不想有甚麼事會被控訴。可能曾經有過 cases,因為大人食煙而燒著小童的睡衣。這是很無稽的。明。其實美國都有團體想消除這個法例。)

Anyway⋯⋯ 這件事好多年前我已經知,所以買睡衣給小豬時都會 make sure 是「not flame resistant」。

小豬的睡衣都是穿 Gap 的,全部都有黃色 tag 寫著:

For child's safety, garment should fit snugly. This garment is not flame resistant.
Loose fitting garment is more likely to catch fire.

應該別的牌子都一樣有相同的 tag。如果沒有就應該是「flame resistant」。

然後我略研究一下,根據我有限的時間的了解是這樣的:

法例 apply to 9M-14歲小童的睡衣,或任何睡覺用的衣物,包括睡袋。這些「睡衣」要符合一個「flame resistant」的測試,要通過測試可分三種情況:
  1. 在布料上加 flame retardant(chemical)。
  2. 本身布料是 flame resistant,所以不用加任何 flame retardant 都可以通過。
  3. 如果睡衣是貼身的(snug fit),就可以免除這個測試。
首先我覺得美國製衣商在這件事上也是很無辜的。據我觀察,好的牌子儘量嘗試 work around it。例如小童睡衣都是貼身的,這樣就可以不用通過 flame resistant 測試。(從而可以用沒有 flame retardant 的棉質。)但如果不是貼身的,如我想買的 Gap one-piece 或 sleepsack 就會用#2,布料(polyester)本身就可以 flame resistant,所以不需加任何 flame retardant。同埋,我想,消費者是會 more incline to buy #2 than #1 的。#2,(多數)不會引起任何 alarm;但#1,多數人覺得有加 chemicals 就會卻步。

但其實,兩者有分別嗎?(不過如果一定要我揀我都會揀#2的。)

不過,事情去到這個地步,已經不是買不買睡衣的問題了。原來有布料是含有 flame retardant 的?!

答案比我想知的恐怖:原來全部 synthetic fabrics 都是用好多好多好多 chemicals 才製成的~~~~~ 而其中的 chemical 當然也包括了 flame retardant 類的!!!

(是不是只有我不知道?!)

唉。好 shock 啊。小豬之前用的睡袋當然是用 synthetic fabric 做的啦。

又略略了解了一下布料的製作,原來以下這些 synthetic fabrics 應該儘量避免,都是用超多 chemicals 製成的:
  • Polyester 
  • Nylon
  • Rayon
  • Acrylic
  • Acetate
  • Triacetate
我覺得頭三、四樣都是常見的!Polyester 更是超 common。(多數睡袋也是用 polyester 做。)

除了布料也要避免有這些 labels 的:
  • static-resistant
  • wrinkle-resistant
  • permanent-press
  • no-iron
  • stain-proof
  • moth-repellant
因為如何做到這些效果呢?咪又係加了許多 chemicals 囉。

應該儘量選擇天然布料:
  • Cotton
  • Linen
  • Wool
  • Cashmere
  • Silk
  • Hemp
​(但天然布料都有可能加 chemicals 去達到某種效果。)

貼身衣物我一直都是選擇全棉的,不過以前選棉質是認為它比較好,並沒有意識到原來 alternatives 可以是有害。

我也明有時真的沒選擇。唯有盡量啦。

+

至於小豬,我決定不買睡袋了。除了不想他穿 100% polyester 的睡袋,其實我也沒甚麼信心他肯穿。這個星期我嘗試讓他穿多一條褲子,但每晚穿時都非常抗拒,終於今晚死都唔肯,所以也沒辦法。(不過我會日日都試的!)。衫,其實三件已是極限,再多穿不下他也不肯吧?但買了新的背心,希望暖些。(穿開那件洗了好多次其實都應該不暖了。)

Thursday, November 12, 2015

其實媽媽好想笑

在廚房聽到小豬在外面「砰」一聲跌倒,似乎好應下。落地時他「ouch」一聲,之後沒有再叫。

通常小小痛他也不會怎樣的,有時會想嗲下我。但如果是幾痛下,他應該會至少叫幾聲或想媽媽呵呵⋯⋯

我輕輕走到門口瞄出去,見他背著我坐在地下,應該是屁股仔落地吧。

我沒有理他。過了一會兒,他走來說:「頭先 baby 跣親好 ouch⋯⋯」

「噢?咁慘慘啊。點解跣親㗎?」

「我踩個盒⋯⋯」

「咁應唔應該踩個盒㗎?!」

「唔應該⋯⋯」

「嗯,係囉。你踩個盒就會跣親㗎啦。咁仲會唔會咁做啊?」

「唔會⋯⋯」

原來係知道自己做錯野所以唔敢出聲⋯⋯ 哈哈。

朱古力狂


同小豬睇「Curious George Goes to a Chocolate Factory」。

佢見到呢頁介紹唔同既朱古力居然吞曬口水,舔舔脷。

我話:「你好想食啊?」

小豬指著第一塊:「Baby 中意呢個⋯⋯」然後自己偷笑。

「咁你食囉。」我說。

然後佢就扮攞來食,傻笑。

頂你唔順啦亞仔。

Tuesday, November 10, 2015

沒有朱古力的香蕉蛋糕


整 chocolate banana bread 俾小豬食。

小豬:「媽媽~ 我真係好中意食你整既香蕉蛋糕啊~~」聽到媽媽暈一暈。

最後咪又係剩低啲冇朱古力既唔食。講到尾咪又係為左啲朱古力囉。

今次已經比平時落多50%朱古力,就係為求啖啖都有⋯⋯

Monday, November 9, 2015

自 mini trip 回來後,小豬多過一半的日子都有 night wakes。〔痛苦〕當哄睡過程漸有起色時,他在前天開始感冒了。〔命苦〕感覺一切又從頭來過。〔天啊〕

(這兩個星期好累呀~~)

Friday, November 6, 2015

那些年。Snoopy。

《Peanuts》(Snoopy 哩⋯⋯)套電影好似係今日上畫。Gap 最近出左 Peanuts 系列,頭先經過,真係好得意啊~~~ (呢度只係其中一部分!)但 cheap cheap 亞媽,六折都嫌貴。等佢再減啲先啦。

我好細個就好中意 Snoopy 啦!!!以前常屋都係 Snoopy 㗎!雖然 Snoopy 係美國狗(!)但呢度唔多產品,就算有都唔多 cute。以前返香港會好瘋狂買好多 Snoopy 野返來!日本出既係特別靚㗎!記得曾經有隻細細地既係我至愛,旅行都會帶埋去(!),點知有次留低左係旅店然後搵唔返⋯⋯ 嗚傷心到掉下淚。(!!)

不過約三十歲時,有感做人要成熟啲啦(!),就將全部 Snoopy 野收左起來,有些送俾人,只珍藏了一部分。生左小豬後,都攞左啲出來俾小豬。佢都幾中意 Snoopy 㗎。

+

其實 Snoopy 既 hometown (Santa Rosa)就喺呢度!從SF駕車約一小時。我當然有去過啦!有 Snoopy Gallery and Gift Shop,還有 museumSanta Rosa 週圍都有 Peanuts 人物像㗎。嗯,要計劃下帶小豬去玩玩啦。

Thursday, November 5, 2015

訓話

給小豬訓話,他抱住我的手臂:「媽媽唔好講野⋯⋯」我定左一下,唔知佢想搞乜,繼續訓話。「你唔好講野啦⋯⋯」小豬抱著我手臂,挨過身過來⋯⋯ 我⋯⋯ 忍住笑:「你到底有冇聽到媽媽講野㗎?!」「媽媽乖乖⋯⋯ 乖乖⋯⋯」小豬邊說邊拍拍我手臂,另一隻手仍然抱著我手臂,好嗲。

唉⋯⋯

+

另一次訓話時間。他笑咪咪整個人挨過來企圖錫我!

哼。

+

我完全係好認真的。點解啊亞仔。

朱古力狂魔

小豬一向不太熱衷喝牛奶。兩歲大的小朋友每日應該喝兩杯(16oz/500ml)。因為小豬個子小,其實他喝到一杯我都已經安樂了;但大多數日子他連半杯都沒有。以前還餵母乳我都覺得,算啦,他喝幾多就幾多啦。(也有人說,戒奶後就會喝多些牛奶和食多些食物,事實是,沒有任何改變。)但戒奶已一個月,我是有少少擔心。

也不是說喝牛奶是必須,但也不見得他吃好多其他食物,感覺就是,能讓他吃喝多些得多些。

因為小豬極愛朱古力,我就想到不如整朱古力奶給他啦。第一次整,跟正常 hot chocolate 做法(不過不加糖),哇,他咕嚕咕嚕輕輕鬆鬆就喝了一杯!但有感如果日日喝,似乎太多朱古力了,我就減少了朱古力⋯⋯ 哼!他馬上喝少少就不喝!!我唯有加多些,他又馬上咕嚕咕嚕喝完!!!

!!!!!!!!!!!!!!!!

我真係好想知,點解我會生個咁既仔!!!係咪上天派來考驗我㗎?!

(雖然在食方面沒有睡覺難搞,但每日都消耗死我不少腦細胞。)

Wednesday, November 4, 2015

Crepe Pan。有樣學樣。

 

收到這個木柄的 cast iron crepe pan,愛不釋手。我跟小豬說:「靚唔靚?媽媽個煎 pan 係咪好靚呢?!」

〔心心眼,自我陶醉中⋯⋯〕

小豬跑去他的廚房仔拿了一個煎 pan:「媽媽,baby 既 pan 係咪好靚呢?!」

〔⋯⋯〕

然後我擺了在地下拍照,他又把他的 pan 擺過來,然後拿了他的「iPhone」來:「Baby 又要影相⋯⋯」

〔⋯⋯〕

+

在 Monterey 去完水族館那天,(提早)外出晚餐時小豬睡著了,因為晚餐地點就在 shopping plaza 裡,然後我賺了45分鐘的 shopping 時間。

大好時機我選擇的店居然是 Sur La Table,然後無意中讓我見到這個 crepe pan。(雖是 crepe pan,但其實同 griddle 一樣吧。)因為現在好多時會煮 pancakes 和 French toast 給小豬做早餐,所以也有想過買個圓形 cast iron griddle。(我有個 double burner 的,實在太重和熱度其實不均衡,所以放棄了很久。)但還未開始 research 買那個好,更沒想過居然可以有木柄!!木柄 cookware 好靚呀!!但那時第一次見到,雖然驚為天人(!),完全超越我想要的,但買野從來都要深思熟慮的我當然沒有買啦。

回到家發現 Williams-Sonoma 做緊八折,哇馬上網購了!!哈哈,都算破了我的「決定買野時間」紀錄了。

+

買來主要是煮 pancakes 和 French toast 的。同煎 pan 的分別是,個邊超級矮,方便 flip。還有面積比較大,可以一次煎多塊。但,既然這個是 crepe pan,好應該有時間試下整 crepe 吧!

Tuesday, November 3, 2015

Mini Trip: Pumpkin Patch


Mini trip 回程時去了一個大型 pumpkin patch。(據說灣區最大⋯⋯)也算是小豬第一次去 pumpkin patch。(去年有去家附近的 cheap cheap 微型 pumpkin patch,就唔算啦。)

裡面有好多野玩,train rides,粟米迷宮⋯⋯ 有座南瓜山,好大⋯⋯ (沒有拍照) 感覺是,好熱啊~~~ 想買南瓜,貴。但重點是個型唔靚,揀唔落手。覺得我們非常混吉;也好無聊。

為甚麼彷彿這裡如果有小孩,十月指定節目一定是去 pumpkin patch?(我已經避了兩年。見個個幾個月大都會去的!) 

不過,影相係靚既。但咁熱,冇乜心情囉。其實又唔係超級熱,係我們著得多衫又唔想除。我著的鞋其實又不適合那種地方⋯⋯ 始終是城市女,覺得地下好髒啊。(!)

但,還有好多年要去呀~~~

後來都買了四個小小南瓜。一蚊兩個嘛。哈哈。

雲雲

睡覺前在小豬房間,他忽然說:「雲雲係媽媽。」

我:「嗯。」

然後他指著櫃上的雲貼紙… …:「呢啲都係雲雲㗎。」

我:「哦,係啊。啲雲雲同媽媽既名一樣㗎。」

不過他的樣子有點困惑。哈哈。

Monday, November 2, 2015

小豬終於識得跳了!!(雙腳同時離地。)他一直都有「練跳」的,但他就是不會。我見歲幾的小朋友就應該識了吧。小豬的手腳就是不太靈活。

糖果玩具


今年的 Halloween 只有一組人來 trick-or-treat!!

剩下的糖變了小豬的玩具。中意分類然後數下有幾多粒。

好乖的小豬,沒有食過一粒糖。因為他問媽媽,媽媽說,不可以食哦。

Sunday, November 1, 2015

Mini Trip 後

自 Monterey trip 回來後,(八晚)小豬有三晚有 night wakes。(這幾個月每月約有三、四次 night wakes,但好像都與出牙仔有關。)昨晚還是兩次。(他甚少甚少一晚多過一次。)不過第二次我累死了,離第一次一個鐘也不夠,見他不是叫得厲害就想著等一等先⋯⋯ 誰知睡著了⋯⋯ (十五分鐘後)再醒來時見他居然也睡著了,哇謝天謝地,中獎啦!但有晚他堅持要拖著我的手,睡著幾分鐘又會扎醒彈起身望望媽媽在不在⋯⋯ 然後又揸實我的手,睡著又扎醒⋯⋯ 來來回回好幾次。後來我知道如果我在他是沒可能熟睡到,唯有用其他方法溜走⋯⋯ 最後用了個半鐘才可以離開。

要「媽媽拖手」也是 trip 回來後的事。如果拖著手可以讓他容易點入睡,其實我可以接受的。但經過一星期的觀察,他拖著我的手根本是睡不著的。這只是他的「不想睡新招」!拖手嗰下,講真幾溫馨的(!)。他是很肉緊揸到實那種,有時還會起身抱住我的手臂。唉冧到死。所以開始我都不忍心拒絕。但除了他睡不著,另其實是高難度動作。因為他仍睡 crib,我一就從欄杆縫伸手入去;一就挨著從欄杆上伸入去,但兩樣都是難就位,好辛苦。

除左 night wake,前晚他居然可以從九點前搞到十二點幾先睡!!十點半叫我,陪了他十五分鐘,出來不夠十分鐘又叫我,然後一直不肯讓我走,直抖纏到十二點。

+

有感,因為見到友帶著半歲的女兒一個月(飛去)旅行兩次!!!然後見她女兒就是很易搞那種。(我不想用「乖」來形容,因為我覺得小豬都好乖的,不過就是不想睡覺而已。)其實不只她,我有幾個朋友今年都生了第二件,個個都已經有去旅行,家陣講緊拖兩件喔!有時心中唯有問,點解… … 雖然自己不算超中意旅行那種,特別其實不需要返工,也沒甚麼大需要去「escape」。講真(現在)湊B也不算辛苦,每日也很 enjoy 呀⋯⋯ 但感到男人需要啊,他常想去旅行啊。但今次試完,我好驚啊。本來有說明年看看可不可以來個長程的,(本來有想過今年啊。)但看看再說吧。我不想花錢受罪啊!

算啦。我認命啦。

Saturday, October 31, 2015

剛剛姨姨講左句含有B word 的… … 小豬馬上跟住整句講。

#有小孩講野要小心

兩歲半體檢

星期三我去打 flu shot,我問小豬:「你星期五都要打針㗎喇,你驚唔驚?」

「唔驚。」

「會唔會喊?」

「唔會。」

+

這幾天都有跟他說要去睇醫生這件事。

我們去到落車時小豬說:「我真係好中意睇醫生啊!」(!)

入到去有同姑娘打招呼;見到醫生有叫醫生。全程檢查都很合作,雖然(被摸還是)有點緊張,被按肚子差點要反抗。

打 flu shot 時有點緊張望著醫生,打完還是喊左幾聲。

(回家後跟我們講左幾次「有喊少少」。哈哈。)

+

無論身高、體重都在生長線5%下。醫生說,但他一直都有正常 growth 所以不用擔心。

+

其實我也沒有怎麼擔心。他就是長得細粒囉。不過,通常不認識的人都以為小豬是未夠兩歲,當知道他真實年齡就會好震驚,然後我就覺得好像需要有甚麼解釋咁⋯⋯ 

當然是不需要解釋啦,但仍在適應做人亞媽(?)有時應對上會不知所措就亂說話⋯⋯ 〔唉〕不過我明的,當你的小孩肥肥白白是比較「易辦事」,不需要太多「解釋」。因為小豬頭一年(甚至到歲半)都是肥嘟嘟,(雖然我一直也想唔通點解可以養得他那麼肥白,因為我明明那時餵奶餵得好辛苦,常覺得他不肯吃。)那時真的湊得好辛苦,有時會質疑自己,但人人見到小豬那個肥胖樣都會讚我「養得好」,雖然唔關我事。但我可以想像到,如果唔係肥肥白白,別人多數覺得「有問題」。(雖然你可以說不用理會別人怎麼說,但新手媽媽本身已經有好多地方質疑自己,絕對不需要別人任何質疑⋯⋯)

睇返小豬一歲前的照片,真的好多肉好可愛啊~~ 

現在小豬仍在穿12-18M的衣服,(不過現在買就開始買18-24M囉。)好處是,慳返不少錢。〔笑〕又,男孩子,baby 期的衣服都可以好可愛,但一到 toddler 就好揀唔落手。唉。不過好處又係,慳返啲錢囉。(唯有咁自我安慰啦。)

Thursday, October 29, 2015

麻煩友


見小豬既廚房仔上面有位,就將呢支巨型酒(煮飯用)放左喺上面。

誰知好快就俾佢發現左⋯⋯  指著咆吼:「我唔要呢個放喺嗰度!我唔中意呢個⋯⋯」Repeat。

吼~~~


Wednesday, October 28, 2015

癡纏

今日食食下 lunch,小豬忽然挨過來:「Mama I love you⋯⋯」然後要錫錫。

呢個仔,成日都會失驚無神要錫錫。錫完又錫。有時見我瞓喺度,會由腳趾錫到頭頂。仲要話:「好中意錫你啲頭髮。」

亞仔,第時你大個仔,唔再癡媽媽,媽媽會唔慣呀… …


(不過我常日都狂錫狂錫佢㗎!哈哈。)

小豬第一次外遊:Monterey Bay Aquarium

上個星期的 mini trip,去了SF南下一個海邊小鎮,Monterey。附近有幾個小鎮,(通常會去埋,)都算有點特色,也算是旅遊勝地吧。(?)因離SF約兩小時多車程,是一個幾好的 weekend getaway 地方。(但我們是 weekday 去,酒店比較便宜嘛。)

Monterey 的重頭戲一定是個水族館吧。今次我們的主要節目就是去那裡囉。


小豬好喜歡親體驗,摸摸摸,摸左好耐。有石頭,有各類貝殼、海草;水是從附近海裏運來的。後來發現,應該不是特別喜歡摸,只是喜歡玩水吧。


雖然企鵝成日見到,但不是常有機會遇著這麼 playful 的企鵝。它跟小豬玩了好一會兒,小豬好開心。



這個沙甸魚 exhibit 可能是我最喜歡的。好大好大,應該有三層樓高(?)。站在那裡好有在海底,與魚同游的感覺。

事實是很多人的,很難得影到這張。(那個是小豬啊!)

除了沙甸魚還有 blue fin tuna,還有一些其他魚。但沙甸魚是一群一群的游來游去,令人著迷。



(又,那裡是全黑沒有燈的,但我見有些人站在那裡影相,有人甚至 selfie。有沒有可能影到啊大佬⋯⋯)


當然,這個水族館的 Jelly fishes exhibits 也是好出名的,好多 exhibits,好靚。又是可以望很久都不厭的那種。

記得上次來最難忘是 Jelly fishes,反而對沙甸魚那個沒甚麼印象。

好多都沒有影相啊,好難影。例如 Sea Otters 好可愛;巨型八爪魚有點恐怖又神奇;Tufted Puffins 個樣好古怪… … 還有好多其他

+

本來是想著在那裡玩一整天的,連午餐都在裡面的餐廳訂定檯。後來因為第一晚小豬不肯睡,搞到早上九點多才起床,食埋早餐都十點幾。男人一度不想去了,因為午餐訂了十一點半的檯⋯⋯ 後來改了十二點半;十一點也去到水族館了。(因為就住在旁邊!)

其實也不需要太多時間,沒有我記憶中那麼大。睇個半鐘去食野,食完再睇多個幾鐘,其實也差唔多了。可以再留耐些,但我們也累了,也想讓小豬坐 stroller 試下可否午睡⋯⋯ 雖然知道沒可能,但都要試下㗎!在裡面推著他行了一陣,知道無望,就離開在街上蹓躂⋯⋯ (死心不息的父母⋯⋯)後來當然是沒成功啦,就不如回酒店休息囉。

(後來五點駕車出去食晚餐時,他上車不久就睡著了⋯⋯ 所以其實他是累的⋯⋯)

Tuesday, October 27, 2015

畫畫

小豬從很小開始就好中意「畫畫」。開始時是常纏著爸爸畫,後來是自己也畫埋一份。但當然他是亂畫一番啦。有時他畫完會拿給我們看問是甚麼;有時也會要求我們畫他想畫的。


今日,他如常地食完晚飯又纏著爸爸畫畫。然後他忽然畫了左邊那幅!講真,是有點 impressed。讚完他後,他又畫多一幅。(他說)是畫同一樣野,兩幅還真有點相似吧?!

奇怪的是,一直他都是畫一堆線條類既野,完全沒有任何形狀。昨天他是有畫一個 spiral 既野,當時我都覺得有點突破性,不像他之前畫的,但今日忽然就畫到有點似模似樣了。

要不要猜一猜他畫了甚麼?(Hint:It's not that obvious. Not a bird.)

Monday, October 26, 2015

數數 1 - 100

今日小豬拿著本 Curious George counting 書,打開這版,說他想讀。

我指著一個一個數字,他一個一個讀出來,全部讀曬。(有幾次他停下來話「唔識」,但我話「你識既」,然後他先敢讀出來。)

他上次要求看這本書應該是個幾星期前,那時他還是第一次識得由1數到39。有好長一段時間,他只能一次過數到29,因為每逢到十位是一個關口,需要幫一幫才能繼續落去。(例如:讀到39,要提他是40,他就識讀到49;提他50,又會讀到59⋯⋯ 直到100。)上次還在想,應該需要段時間先過到40。

但忽然間他就明了。

另,以前如果順著讀,他沒有問題,但如果隨便抽個數字出來,他不是每次都識讀。但今日,我隨便試了好幾個大的數字他都識讀。

感覺他是忽然開竅了,因為這個期間沒有教過他。其實我很少主動教他數數,或認字。他好幾個月前就好喜歡數野,所以買了這本書可以數到100的。但通常是他想讀時我才會陪他,不會主動叫他數。目前為止多數都是數30樣野內,因為多他也很怕數。(但今日那版是數字,不同。書裏面是數各類不同既野。)

這本書值得推薦。當初買,Curious George 是很大因素,因為小豬很喜歡。覺得也可以當故事書看。整本書就是 Curious George 不停搵野數,從一數到一百,是一百樣野。比較喜歡的是,數既野都是平時生活上接觸到的。圖案也很不錯。

貼幾版參考參考:




講英文

一、兩個星期前某天,小豬忽然對「講英文」產生興趣。自那天後,他就常在「講英文」!問題是,他不懂講英文啊。他會好多英文單字,但他極少機會接觸到英文對話,所以他不懂講句子。他講的「英文」是他自己作的,我完全聽不明。

以前與他讀書,我都是講中文的。但現在有時他會要求我讀英文。(但因為他不太懂有時顯得有點悶。)

他也會拿著書,「讀英文」。他會讀主角的英文名,然後加好多「and」、「then」、「the」… … 及一些他會講的英文單字,其他都是他亂作出來的。

所以,現在開始希望能教他一些簡單句子。

Sunday, October 25, 2015

Elmo 冇耳仔

前幾日,小豬揸住 Elmo 忽然同我講:「Elmo 冇耳仔㗎。」我正驚訝他的發現 — 因為我從來冇留意到啊!— 他又指著書上既 Elmo,然後用好 convincing 既眼神望著我:「嗱,呢度都冇耳仔㗎。」

我馬上 pull myself together 然後故作鎮定地說:「係喔,Elmo 冇耳仔嗰喔⋯⋯」

Saturday, October 24, 2015

小豬第一次外遊

三天兩夜的 mini trip 終於完結了,回到家真好。

第一次帶小豬出門,一直的懼怕是真的,沒有多慮。好在沒有去太遠,(只是兩個多小時車程,)好在也只是兩晚。

知道如果與我們一起,小豬是不肯睡的,所以特別訂了間套房,在廳給他「製造」了個算不錯(?)的床仔。(酒店提供的 crib 好可怕!)

第一晚,整個哄睡過程很順利,他也似乎很喜歡(?)自己的新床⋯⋯ 如常地 kiss say goodnight⋯⋯ 感覺一切都很美好⋯⋯ 但當我踏進睡房那刻他就彈起身:「媽媽~媽媽~」。

噩夢開始了~~~

(第二晚把「床仔」搬進睡房,他完全地拒絕。)

之後當然是讓他與我們一起睡了。第一晚,從八點半搞到十二點半他才睡著。十二點半到二點間,他坐起來兩次(據我所知)但有睡回去。兩點醒來狂哭,搞到三點半才肯再睡。睡到九點多。第二晚,九點多搞到十二點,睡到八點。(其實他七點醒來坐起身,但我把他拉下來,讓他躺在我手臂上,然後他又睡多一個小時。)

我們全程是與他一起睡在床上,lights out,不理會他。他自己翻來覆去,嘰嘰喳喳,玩呀玩。得閒搞下我們;有時爬落床。幾個鐘,頭都爆。

他不停說:「我以後都唔要咕咕豬啦。」又說:「我以後都要玩。」

暈。

就算他睡著了,他是整個人打橫睡在我們中間;頭不停撞我,腿不停踢爸爸。(他睡床仔每晚都打幾個轉。)整夜也不知醒了多少次,滾來滾去。可憐我與他爸都是貼著床邊睡。我呢,每個鐘都醒一、兩次。他爸也說不停醒;醒來嘴唇還受了傷,應該是被亞仔踢的吧。

慘。

+

不過去之前已經作了最壞打算,雖然仍比想像的恐怖。這也是我們從未帶他去旅行的原因。我真的不想整個旅程是這樣。只是兩晚,我們倆已筋疲力盡。

第二晚小豬已嚷嚷要回家,又說好悶。(雖然我不確定他是否 fully 明白自己在說甚麼。)昨天回到家也顯得興奮,也表示比較喜歡在自己的床仔睡,不喜歡與爸爸媽媽睡。

不過整個旅程,小豬除了不願意睡外,其他時間是超乖的。所以也算玩得開心的,哈哈。但沒有得睡超累也是真,捱不了幾天。(回來時我很累不想駕車,問可不可以讓爸爸駕車,但媽媽也坐前面(沒人陪他坐),他說可以,也真的乖乖自己坐。)

下次再去,會很認真地三思。


無敵海景 from 酒店房間。如果可以呆坐那多好⋯⋯

Tuesday, October 20, 2015

媽媽你睇,有隻孔雀呀~~~


亞仔你隻手可唔可以唔好咁 cute 啊~~~


(我哋跟住隻孔雀行,佢一啲都唔驚我哋… … 可能只係覺得好煩:可唔可以唔好跟住我啊?!)

Friday, October 16, 2015

牙仔 #20。出齊牙仔啦!!

前幾日發現小豬最後一隻牙仔冒出來了!發現時已經出了少少,應該是出了好幾日了。月頭他有晚有 night wake 叫我,可能就是出牙仔吧。希望他以後都不會有 night wake 了!(!)

雖然小豬不喜歡睡覺,但,他的睡眠問題一般在他睡著後就解決了。他的問題只是不想睡,睡著反而很少醒來要媽媽。(因為 night wake 是完全另一種問題。)

〔29.5M〕

Wednesday, October 14, 2015

玩水

 

喺公園行行下,媽媽忽然大發慈悲無端端俾我玩(好似唔係好乾淨既)水呀~~ 本來我以為都係拖住媽媽手玩一下⋯⋯ 誰知媽媽居然放手俾我盡情玩個夠!!哇媽媽梗係傻左喇!!

我的甜心。

我整親隻手,痛到大叫起來。正在自己玩緊既小豬馬上咚咚咚的跑過來,抱著我的腿連環錫錫,然後以非常 concerned 的眼神望著我:「媽媽你 ouch 啊?!」

「係啊。」

「過來過來⋯⋯」他命令我把手給他,樣子就是「媽媽不用怕我來保護你」,然後又連環錫手幾次。

+

仔,可以這樣一直 sweet 落去嗎?

+

小豬真的是個好 sweet 的小孩。每次我發出少少「痛聲」他都會跑來呵呵,錫錫。那關懷的眼神冧死你。

如果我話「我唔開心」他也很 concern。昨天我叫他幾次做樣野他都不肯去,還拿出一個玩具玩。我拋下「媽媽唔開心啦。」轉頭就走。本來我都只係即興講,離開房間後偷偷望回去,居然見到他收起玩具,然後來搵我。甜曬。(當然呢招唔可以濫用啦。)


最近。小豬每次沖完涼未抹身,就緊緊地攬實我… … 以把媽媽弄濕為目標。笑到卡卡聲。仲要大叫:「爸爸快啲來睇下你個仔啦~~~」(因為我叫過一次之後他就學我囉。)

Tuesday, October 13, 2015

小豬的 Obsessions。

小豬有好多 obsessions;要記下來。

比較新的 obsessions 是:
  • 出街瘋狂搵「雪糕桶」。
  • 室內瘋狂搵「EXIT」signs。(會讀出來:「呢度有 E-X-I-T 呀媽媽。」)
  • 搵招財貓!!(前日到 Japantown 見到好多,非常興奮。)

這些已經有一排了:
  • 好中意數野,咩都數一餐。也中意讀數字,在街見到數字(例如門牌!)會讀出來。
  • 出街見到 STOP signs 會指出來。(也會讀出來 S-T-O-P,stop!)
  • 中意讀字母,串字。睇書時會讀比較大或明顯的字母出來。有時會問我乜乜字點串;又或叫我問他。出街都會週圍搵字母。(在停車場見到T字位線會話係個「T」字。)
  • 留意任何種類的旗;見到就會指出來,唔識就問咩旗。咁當然見到最多既係美國旗,每次見到都會講。屋企附近的都記得咩位置有。見到副 jigsaw puzzle 盒底有好多(不同國家的)旗,不停問我係乜嘢旗;(大佬好多亞媽都唔知,要 google 啊。所以有小朋友係學到嘢的!)又要爸爸畫旗給他。有次去超市我揸住樽油,他哄過頭埋來:「有法國旗啊媽媽。」那旗只有四分一寸那麼小!我完全冇留意到囉!

其實總括就係好好好好好好好中意搵野囉!!!無論係書或現實生活。所以我們出街好忙的!!

Monday, October 12, 2015

離乳了嗎?

今早小豬已經 in position 要餵母乳,我問他:「不如唔好再食媽媽 milk milk 囉,好唔好?」

然後他點下頭:「好!」

嗚~~~~~~~~~~~~~ (!)

「下真係唔食啦?唔好唔食啦!」(矛盾的媽媽。)

小豬搖頭唔要然後準備走。

我⋯⋯ 好悲傷啊⋯⋯ 真係就咁啦?!Today is the day?!呢日終於來到啦?!

我抱著小豬不讓他走。(!!)

+

其實今個月開始小豬已經唔係好似之前咁食奶了,明顯快左好多。有時都係意思意思啜幾口就走人⋯⋯ 所以我都已經預想到呢一日就快到。其實呢排我日日都問他可唔可以唔食。但他次次都嚷著「唔得」!(媽媽聽後其實係開心的。)今日突然話「好」,仍係有點難以接受啊。〔嗚嗚〕

做媽媽的心情實在有夠矛盾的呀。是真的真的真的真的真的真的不捨得戒… … 但你又知,其實遲早都要的啦… …

+

小豬月尾兩歲半了。我餵了母乳 30 個月啊!!忽然要停止這個每日的習慣,會唔慣吧?!會失落是正常的吧?!〔嗚〕

I will certainly miss these sweet days with my baby… …

是日案發現場


成碗湯跌落地。

我覺得自己好勁,超級鎮定。

可憐的貓貓碗。

Sunday, October 11, 2015

如何切粟米粒

今日在 Farmer's Market 的粟米檔寫著:最後一天了!

這個夏天食了好多粟米啊!新鮮的粟米真的超清甜超好味。過來後感覺回不了頭,以後怎麼食其他粟米呀~~~

好多人都問我怎樣切粟米粒出來;似乎多數人都覺得這是艱巨的步驟。我覺得幾簡單的,我一直都是買整條粟米,然後切粒煮。有些人為了不用切粒,會整條蒸來食⋯⋯ 也是可以啦,但這只是其中一種食法。(不過我極少這樣食法,因為一討厭用手食野;二覺得這樣整條食弄到自己很狼狽;三配合其他食物會更好味。)切粒後可以有好多變化。(這個夏天最愛莫過於將粟米粒放進 pasta salad 裏了!)

這是我的方法:


1)撥掉粟米葉,抝斷為兩段。(我是徒手抝的,如果你做不到,可以用刀切。)

2)切口那邊向下,少少向右傾斜,(如果你用右手,)用大刀貼邊從上切下來。(傾斜少少一來容易少少切;二來粟米粒不會那麼彈。)

3)切完一邊,轉右重複第二步,直到切曬為止。(我通常切約五刀。)

就這樣,真的超簡單吧?!不過也是要小心手喔。

+

簡單煮法:中火熱油,(extra virgin olive oil or butter)(可以落些蒜蓉或 shallot 片,沒有也沒問題。)落粟米粒。(有 thyme or basil 可以落些。)煮約八分鐘。間中搞下。加鹽和鮮磨胡椒粉。即成。

Saturday, October 10, 2015

宅媽

因為小豬現在經常週末都(有一天)不午睡,今日就來個新嘗試,出街一整天,不帶他回家午睡,安排時間看看他能否在車上午睡,如果不午睡也就算。

其實也沒有「一整天」,十一點多出去食午餐,之後逛到略過小豬午睡時間,然後駕車半小時去另一個地方,好讓他午睡。他用了20分鐘才睡著;到達後在停車場睡了半小時,也很不錯了。之後繼續逛,直落到晚餐,七點才回到家。

(回到家,小豬趴走地上:「我唔要返屋企!我唔要返屋企!」)

然後他今晚用了 1.5 小時,十點半才能入睡!〔呼〕

我呢,11am 直落到 9pm 才算正式可以休息!我想講:我累死了!!原來讓他在家讓他回家午睡不是為他,是我需要呀!我需要那段時間休息休息啊!

不過,其實今日都有幾段時間(!)我是拋個仔給男人,自己逛的。然後兩餐都是男人負責餵食的。(小豬雖然算懂得自己食,但需要大量幫手。)所以,最累的人不是我… …

我… … 真係唔係好捱得,真係唔係好適合出街太耐,真係只是宅媽一名。

(所以我真係好適合在家湊仔。最好日日唔洗出街。(!))

Thursday, October 8, 2015

靠自己

小豬把兩個螺絲派互相敲打時,其中一個斷了。 

他第一時間並沒有叫媽媽幫忙,(雖然媽媽就在附近,)而是自己修理好。然後又斷幾次,(後來他故意把它敲斷… …)因為接口不是圓的,有時不是一放就能進去,但他也不要媽媽幫忙。就是要自己做到為止。

我喜歡這種做事態度,(天生嗎?)不要下下都要別人幫手。至少首先要自己試試才求救吧。

不過,我希望,如果真的做不到時,也是需要別人幫忙的。我是怕,小豬是那種,自己做不來也不要你幫忙。這,也是煩的。

Wednesday, October 7, 2015

Do You Want Pizza?

昨日小豬玩黏土整 pizza,忽然問我:「Do you want pizza?」

好 shock!

呢個應該係佢第一句完整英文句子!!

Eco Dough。Play Dough。


Play dough 自半年前買後只讓小豬玩過兩、三次我就宣佈投降,收了起來。

昨日小豬纏著我要開我的書台的櫃 — 因為他見過我從那裡拿新玩具出來所以認定裏面藏著好多新玩具!〔暈〕— 打開真的沒有,但他不死心,望呀望。我見play dough 在裏面,就說不如玩這個啦。

他一玩就個半鐘!好投入!雖然我見他大部分時間都只是將不同顏色混合一起,說是整 pizza。

最後把五種顏色全部混合一起。〔嗚〕

+

還以為中了彩,找到樣可以讓他玩很久又不需要我的玩具⋯⋯ 今日他玩時就不停叫媽媽一齊玩⋯⋯ 〔呼〕其實也怪不了他,昨日整左成個鐘 pizza,難道今日仲整咩。何況昨日是可以把不同顏色混合一起,今日,全部一樣的。〔唉〕我有些 cookie cutters,印印呀之類,但其實他自己也不是完全可以掌握到,還是需要一點幫手。現正看看可以買些甚麼道具能讓他自己玩!

+

我們的 play dough 是用 Eco Dough by Eco Kids。

寫著是 handmade,美國製造。在盒子上有寫 ingredient list,都是很 natural 的。對香味超級敏感的我覺得隻味非常接受到。顏色不算鮮豔,但我覺得都不錯。(但現正都混合一起了⋯⋯)玩得算乾淨,不黏手。保養期似乎很好,擺了半年仍好好的。

沒有玩過其他 play dough 所以不知怎樣比較,但我是幾滿意的。(例如 Play Doh 那隻牌子的我是不想碰囉。)

不過⋯⋯ 有點貴是真的。

又不過,如果要再買我也會咬著牙關買的⋯⋯

盒子上印的資料:

 

紫薯糖水 Yummy 啊!

Farmer's Market 開始有紫薯出現,買了今晚做了糖水。

  

小豬完全大愛!不停說「好 yummy 啊!」還要求爸爸媽媽都這樣說。喝完還要望爸爸的碗有沒有剩。又說:「我好中意飲甜品啊!」(因為我說是「甜品」,下次要說是糖水了。)

Monday, October 5, 2015

載著小豬,他望出街不停在找「雪糕桶」。我終於見到一個就告訴他,但他望呀望呀到架車過了也似乎見不到。

我問他:「有冇見到啊?」

小豬:「我咁矮,點見到唧!」

!!!

+

又,自從救過「雪糕桶」後,小豬現在出街無論坐車或行路都不停尋找「雪糕桶」。原來週街都有「雪糕桶」的!!

最中意的小動物

煮飯中,小豬問:「媽媽你最中意乜野小動物啊?」

我:「嗯⋯⋯ 長頸鹿囉。」

小豬:「媽媽頭先都唔係咁講既!」

我:「吓?!」

小豬:「媽媽頭先又話係 tiger 既。」

我:「⋯⋯」

+

回帶到一個小時前:

我在包禮物,禮物紙有幾種小動物。小豬指著獅子說自己最中意「lion」,然後問我最中意哪個。我當時係答「tiger」的。

安全


這個應該係我見過小豬「最危險」的行為。都說男孩會爬高爬低的,安全第一的小豬非常安分守己。

又,出街他一定要拖著我手才肯行的。生怕媽媽掉下他。

Sunday, October 4, 2015

Luv Chicken Booster Cushion


現在我們外出用餐都會帶這個 Luv Chicken Booster Cushion 給小豬坐。


最大優點是,超級輕;方便攜帶。

但,因為只是 cushion 一個,未能坐得十分穩的小孩是不適合的。小孩小,也不夠高。小豬好像是約2Y3M開始用,或者再早少少都得;但我從很久以前就一直一直地找,都沒有合適的,直到有日無意間發現,馬上買!

質素非常好;圖案也靚。非常容易清洗,一抹就得。底面是 non-slip 的,所以個 cushion 不會移來移去。非常寬大,15寸 x 15寸(38cm),高4寸(10cm)。

+

在用這個之前是用(似乎全世界都用的)Fisher-Price booster seat。但在小孩未能坐得穩時,也是需要這種的。有個 tray,在小孩學自己食期間一來方便,二來可以防止小孩亂動甚至企圖不停起身。(小豬有個期間如果讓他坐 high chair,他會不停地站起來,坐不定。)不過這個 booster seat 真的超重,重點是一點都唔靚!(!)所以我很討厭攜帶它。(!!)加上當小孩開始大,就會太窄。

+

當然現在小豬也可以坐 high chair 的,但我覺得大部份的 high chair 都好嘔心,接受不到。我們外出用餐都是駕車的,而個 cushion 會長期擺在車裏,不用拿著通街走,所以我覺得也很方便的。就算到別人家中吃飯,也可以用呢。

+

他們的 website 賣 $45,但我在 Babies R Us 買只需 $30。真的好中意啊!!