Wednesday, December 9, 2015

是日新招。不想睡覺的小孩。

「我唔中意媽媽大聲講嘢~~~ 媽媽唔好大聲講嘢~~~」邊講邊哭!!!

亞仔,如果你唔激嬲媽媽,媽媽又點會大聲講嘢?!家陣明明係亞媽嬲緊喎⋯⋯

其實我係好嬲咁同佢鬥纏緊⋯⋯ 因為每逢接近睡覺時候他就開始拖延時間,又呢樣又嗰樣,煩到爆炸。如果唔惡少少佢既要求係唔會停㗎!

(後來梗係要安慰返佢囉乜世界… …)

+

做完睡覺 routine,媽媽係時候離場了。唔肯。拖手。鬥纏一番,終於肯 kiss。站著 kiss and hug 完到躺著 kiss,然後再要飛吻,要雙手嗰喔。沒問題,次次都要做。但就在我站在門口飛吻時,(因為要飛吻好多次⋯⋯)他也已經飛吻了我啦⋯⋯ 點解會忽然話「我好驚啊我好驚啊~~」

樣子又真係好驚,媽媽心軟。又鬥纏一番。拖手。理論。

如果他肯睡我真的可以陪他的,但他明明就是非常睏,但整個過程沒有合過眼啊!對眼碌到好大,想怎樣呢。

我說:「你要媽媽拖手都可以,但你要咪埋眼。」

「我好驚!」

「你驚乜嘢?!」

「我驚咪埋眼~~~」

驚。咪。埋。眼。!!!!!!!

Ohh well。

What can I say。

完全發現自己中伏。等亞媽剛才還有點內疚以為係自己有錯令到亞仔失去安全感⋯⋯

亞仔,你唔係驚咪埋眼,你係唔。想。咪。埋。眼。!!!

喺嗰刻開始我知道自己要儘快閃!如果唔係條友唔洗瞓㗎啦。

(後來拖多陣手我非要走佢哭左兩聲咪又冇事囉… … 不過我走後都死睜著眼半小時… …)

+

我想講,一個正常人係無法想像到一個唔中意睡覺既小孩係幾令人頭痛!!無論我同人講幾多,我發現其實他們都係唔明,或低估個可怕性。有時我都講到覺得自己 sounds like 把事情嚴重化。我想每個小孩點都有些日子係唔多願意睡覺吧?(如果你既小孩冇,你真係唔知自己幾咁幸福。)請想像每一日都係咁!!

係一種精神上的折磨,我只可以咁講。

9 comments:

  1. 我個女都唔鍾意瞓,未夠四歲,成日話自己大個,不用午睡了。但其實捱不到多久,真的不讓她午睡,到傍晚她就會累極入睡(或在車上,或在沙發上)。

    有時迫她午睡,搞到我都忟,或者好似變了做衰人,但唔惡少少她真係會一直玩一直玩,不肯睡。

    不過我習慣陪到她睡著才靜靜離開

    ReplyDelete
    Replies
    1. 咁至少你個女眼訓係會訓! 我個仔眼訓係會 fight sleep 的,而佢真係可以唔訓。我從來從來未見過佢玩玩下會訓著。就算未夠兩歲半佢已經開始skip nap,而佢係完全可以捱到。如果唔逼佢,佢真係可以唔訓架。

      我覺得如果小朋友還需要午睡既,父母係應該用盡辦法讓他睡的。聽你咁講,似乎係最近既事?晚睡呢?我個仔從一個月大已經開始唔肯訓啦!! 係每次!!

      如果我陪佢會幫到佢訓我一定會做!! 但我係度對佢來講即係「唔洗訓」。我幾乎每次都要逼佢,(不過近幾個月好左好多,呢幾日可能病所以又發作。) 但整個 sleep routine 佢都好多招式去拖延時間。日日都要見招拆招,好累啊。

      唉,所以你個女已經算易搞啦相比。同埋我想,去到個個年紀,唔想午睡都正常既。

      Delete
    2. 你係咪提到你個仔唔算高呀?

      我個女係好矮,所以我諗瞓得少可能真的跟身高有關係。

      我個女夜晚大概10:30-11:00睡覺,算夜啦,有時都會掛住傾偈,但我會迫她唔好講野唔好睜開眼,如果唔係就關音樂(她喜歡聽住音樂睡覺),又或者有時我陪她一起睡,好可能我睡著了她還未睡,不過唔理她就會慢慢睡囉。

      我都知對住一個唔睡的小孩好痛苦,有時我會幻想用棍扑暈她算數。她在睡覺方面不算太難纏,但脾氣真的好差,呢排病了脾氣更差。唉。

      Delete
    3. 咁你個女又真係唔中意訓個種。同埋真係好夜訓囉。我接受唔到咁夜。因為睡眠對小朋友來講太重要了,(好多腦部發展都發生在睡覺中?)呢兩年幾來,個仔既作息時間完全係我地生活既 first priority。

      你有沒有諗過,你個女既脾氣差可能同睡眠不夠有關?我絕對知道我個仔會係。同埋你個女有沒有 night wakes 架﹖我個仔舊年呢個時候,因為大病一場之後睡眠大亂,然後我做了個錯誤讓我老公哄他睡覺,(因為我想要個 break!)因為我老公比較 soft,佢常日話個仔唔肯訓,就陪玩好久,每日個幾兩個鐘!! 然後我個仔也是多數越十一點先訓。結果就係,我老公累死,個仔每晚也玩到癲左,最後我老公也是要強逼離場個仔先肯訓。然後個仔機會晚晚有 night wakes… … 完全是災難!! 經過一個月終於頂唔順我 take over。我會比較強硬,sleep routine 完我就走,哭就由得他哭。但一讓他早睡,完全沒有 night wakes,佢成個人都 pleasant 左。

      到左佢兩歲後,懂既比較多,其實好辦好多,例如我講左三本書三首歌,講左就係咁。佢知既。雖然每次都企圖睇多本書,唱多首歌。但過左幾個月佢比較少 make request,哄睡過程也簡單好多。不過如果病左例如近日先會比較扭計。

      可以既話真的要讓你個女早些睡啦。十點都算遲啦。同埋,你都辛苦啦。可以早點開始準備睡囉。(我地七點半開始,個仔九點半才睡著。)

      Delete
    4. 至於身高與睡眠有沒有關係,哈哈我唔知啊,應該都有些掛。聽講係訓緊先長高囉。但其實我個仔唔算睡得少,唔多,但我覺得還可以,因為我一定逼佢睡的。每日都有約11個鐘睡眠的。(連午睡。)同埋,佢唔係點飲牛奶,又唔係好肯食野(另一個 headache!!),又唔係跳跳紮紮個種,所以有各種原因矮掛。哈哈。

      Delete
  2. 我女幾乎晚晚都會醒幾次,睡得很差,但最近天氣凍,好像又沒有醒(大概有四、五天吧)。她在我們房睡,會弄得爸爸睡不好(因她太反瞓),但她回自己房間睡,半夜又一定會走過來找我,我陪她再睡,如果她醒來兩次,我就整夜也睡不好。

    其實我都想她早點睡,但因為我們在嫲嫲家吃完飯才回家,一般已是八點多,回去後改改功課,溫溫習,三個人洗完澡,其實都九點多,還要陪她玩,陪她講故事,所以很多時都拖到這麼夜。

    我已開始擔心讀小學時怎麼辦,見她表姐每天功課溫習停不了,但還有兩年,到時再安排好了。

    ReplyDelete
    Replies
    1. 咁樣真係好辛苦喔,每晚醒幾次。哪,老老實實,再聽你咁講,我又唔覺得你個女係唔中意訓喔,其實係太遲訓,搞到佢訓唔著。小朋友有個「sleep window」,過左就難以入睡。其實大人都會,攰過頭反而訓唔著。

      已經夜訓,又會醒幾次,咁好難有 quality sleep。講真,對個小朋友應該係有影響的。感覺係長時間缺乏睡眠,也難怪會脾氣暴躁。

      有小朋友生活規律係要有一定既調整。例如我地以前係5:30就食晚飯,而家6:30就食。去街食6:00。會儘量7:30前返到屋企。我8:30就放低個仔訓,但佢通常搞一個鐘先肯訓。(所以真係唔中意訓⋯⋯)我覺得9:30都算遲,但我個仔算遲起床那種,所以都覺得ok,他通常都會訓十個鐘,唔會半夜醒。

      真的要試讓她早點睡,可以提前幾多得幾多。例如可否早半個鐘食晚飯;功課食飯前搞;一返到屋企就同佢沖涼睡覺。(你自己就等她睡了先算囉。)試一、兩個星期,可能就可以解決她 night wake problem,咁個個都訓得好。如果你真係覺得好難做到,可以係週末試兩晚,目標係讓她九點就睡到。看看是否有分別。

      另,晚睡和午睡係息息相關的,一個睡得好另一個也好,一個睡得唔好,也會影響另一個。好多人覺得,小朋友累就會睡,(如果不睡就係唔累!)其實係好錯的。越累反而越睡唔到。

      希望你唔介意我既建議,身為一個有個唔肯睡覺既小孩既媽媽,我對呢方面都算略有研究,都試過好多方式,都有少少經驗咁。我好明白想小朋友睡覺既痛苦。有乜可以幫到你既即管開聲。

      PS:如果你post後見唔到自己既留言,係因為去左 spam!

      Delete
    2. 補充:如果你九點幾先開始準備同佢訓,十點幾訓著係好正常,唔算話「唔想訓」。因為 sleep routine 20-30 分鐘,然後小孩用 20-30 分鐘才睡著應該都算正常。

      Delete
  3. 她睡不好的問題其實一直困擾著,BB的時候晚上睡BB床,也是會半夜醒了要過來大人床睡。一直也睡不好,也有看過中醫,但沒長期吃藥,所以也不知有沒有效。

    最近我們都病了,所以懶得搬走她,也不知道她半夜有沒有再醒。(前一陣子她半夜會起來去廁所,但近期又沒有)不過這邊天氣又凍了,今晚要搬她過去,因她房有暖氣。

    其實她是貪玩不捨得睡,可以玩的話就會一直玩。但真要她睡覺(如果已經很夜,會強迫她睡覺),她閉上眼不到五分鐘就會睡著。當然,也會有試過一直睡不著,或掛著說話的時候,又或者睡得不安穩我就離開,她一醒來看不到我就會哭著要我。但其實夜晚睡覺不算太難搞。

    反而是午睡她因為一直想玩,所以要不停迫她睡,她閉上眼過一會又睜開,午睡可以糾纏很久。如果下午有活動我會比較忟,因為她浪費時間玩,到要起來她又睡不夠又會發脾氣。不過如果沒有活動,就可以輕鬆一點。

    謝謝你的建議,要多花點時間調節睡眠時間。

    ReplyDelete