Monday, February 29, 2016

可唔可以唔好咁快冇午睡。

小豬連續三日冇 nap 到。應該咁講,過去一個星期佢都係 nap 左兩日。

其實今年一開始第一個星期,同樣情況已經出現過,嚇得我。但一個星期後佢又正常返少少,由一星期唔 nap 一次變兩次,但都好過五次吧。

正常呢個年紀既小朋友如果唔 nap 到食飯時候都應該攰到癲吧。唔係我個仔,佢有無限既精力。如果俾佢揀佢會一直玩落去。

〔2Y10M〕

I Love Little Moments Like this。

同小豬睇《Olivia》。講到 Olivia 有隻狗叫「Perry」,跟住小豬說:「Perry 有啲似 Mary⋯⋯ 都係有個‘ry’字。」

我有點兒震驚,(唔知點解啦,覺得佢 make 到呢啲 connection 好似好神奇。)呆左一秒出唔到聲。然後佢用好肯定既眼神望住我點頭說:「係㗎。」

我真係好愛你啊。


(又,其實已經幾個月未睇過呢本書了⋯⋯)

Saturday, February 27, 2016

今日小豬又俾人誤會係女仔… … (係應該剪髮啦,但成身男仔打扮喎… …)〔2Y10M〕

亞仔你諗乜啊?

唔知我個仔想點。前兩日六點就醒,今日五點!!但佢冇叫我,就咁坐喺床仔度⋯⋯

其實我唔肯定佢幾時醒,只不過我五點醒左見到佢坐左喺度⋯⋯ 之後我瞓下醒下,最後一次六點半仲係見佢同一個位置⋯⋯ 跟住七點三就見到佢瞓左!一直瞓到九點!!

前日六點醒左有叫我。我一入去就話要睇本書,之後就唱歌再放返落床仔。但當然冇瞓,七點又叫我。

昨日佢六點醒左但冇(乜點)叫我,一直企喺度到七點先大聲叫。(佢每次醒左都會企喺同一個位置望住窗外。但係有落曬窗簾的。)

(唔知係唔係我晚晚都提醒佢:你天光先好叫媽媽;醒左天未光唔好叫媽媽喔⋯⋯)

佢以前未試過咁早醒囉,仲要連續幾日!!好怕係個 trend 啊!好驚。雖然唔使理佢,但其實自己都瞓得唔好,好攰啊。對佢來講都唔好,佢已經唔係早瞓嗰種,nap 得又少甚至唔 nap。(前兩日都冇 nap 啊!)但佢真係好似唔使瞓。而家佢越來越多嘢諗,可能咁所以瞓唔到⋯⋯

(不過我今日好開心,男人帶左個仔出去,我攤喺間床到而家(差唔多十一點),所以有時間打呢段嘢⋯⋯ 嘿。)

Monday, February 22, 2016

晚飯時我見小豬係咁望住我,我就問佢:「你做乜望住媽媽啊?」

佢挨個頭過來:「因為我中意你啊嘛⋯⋯」

Friday, February 19, 2016

小公園


小豬病了成個星期。今日帶他出去附近的小公園行下。

小公園有個小小的 playground,有適合小 baby 玩既滑梯和韆鞦。我很久很久沒有來過了!(但男人有時會帶小豬來。)因為覺得幾低B,無嘢玩⋯⋯ 但其實,走遍各 playgrounds(!),這個滑梯應該是最討小豬歡心的吧!就是因為夠低B他才敢玩!

去到小豬滑了兩下,見有另一個小朋友來滑他就不肯滑。後來我們在公園行了個圈,等他們走了才肯再滑。

他自己滑了好多好多次;我未見過他這樣。我也終於終於可以第一次坐下,望著他玩!!〔灑淚〕(雖然好像只是十分鐘;同時他每次滑完我都要說「One more time!」他才肯繼續⋯⋯)我以前就是會幻想,帶小孩到 playground,讓他自由活動,然後我可以 um um 腳坐下休息下⋯⋯ 養左他快三年才第一次,命呀⋯⋯

Tuesday, February 16, 2016

呢個仔… …係乖既… …

我問小豬:「Baby 你想唔想食朱古力香蕉蛋糕?媽媽整俾你食好唔好?」

然後佢好認真同我講:「但我病喔… … 病係唔食得朱古力嗰喔… …」

Sunday, February 14, 2016

Just Another Night

病了的小豬睡了不夠兩個鐘就哭著醒了。

我抱著他,忽然感覺他要嘔,我伸出手,嘔了在我手中⋯⋯

+

之後看書,唱歌。

唱了一首他說想尿尿,要去 potty 痾。

回來後我叫他拿新 diaper,他說不要,要著返舊的。(!)媽媽掉了。大哭。不要,一定要著返舊的。

好在我身手好,趁他不覺間已經拿左新的 diaper 然後出去當舊的⋯⋯

+

換好 diaper 再放他落床仔。他望了望我:「你既眼鏡呢?!」然後搜索我的眼鏡⋯⋯ 我:「媽媽冇戴眼鏡啊⋯⋯」亞仔:「有!媽媽有戴眼鏡⋯⋯」(幻覺?!)

我喇喇聲去除左隱形眼鏡然後戴返副眼鏡,大王才感滿意。

+

之後諗起隻手,都幾想嘔⋯⋯

Saturday, February 13, 2016

Pete the Cat Lego



在圖書館與小豬看了《Pete the Cat》這本書。



回到家他自己用 Lego 砌左這個出來話係 Pete the cat,食緊橙!(書裡沒有食橙環節!)

Honestly I'm a bit impressed!真係幾似呢!


〔2Y9M〕

動物園。農場。爬。倒影。

星期三。



每次去動物園裏的農場我都覺得應該多啲來。事實真係好少來。


人地女孩比小豬還細,一爬就爬上去。我個仔呢?爬左好耐還係個狼狽樣。(不過後來都成功左。)


看 flamingo 時,小豬說:「媽媽水裏面都有 flamingo 㗎。」嗯,我才發現,係喔,好靚呢。

Thursday, February 11, 2016

Lego OCD


最近小豬玩 Lego 有過幾次近乎崩潰時刻出現:當他想把四格和三格連一起時,他堅持要塊三格的擺在四格的正中間!!後面那塊兩格的擺落四格的不平均也是接受不到。

但奇怪係,他玩左 Lego 已經有半年,好似係忽然間發現呢個問題。

Days of the Week 底褲仔


當初買呢套底褲仔俾小豬時其實並不十分喜歡,一來唔覺得得意;二覺得,唔通每日都跟住星期幾來著咩?低唔低能啲啊?(!)

但相對上呢套比較便宜,我本諗住買來做後備,預防多 accidents。

開始我很少用呢啲底褲仔。間中用下,佢會問我,上面寫左乜。講俾佢聽,又會問係點解。開始真的唔係好識答,胡亂應付下佢就算。因為覺得「星期幾」呢個 concept 好難,講左佢都唔明⋯⋯

直到有日我發現佢見到某條底褲仔,然後問我係咪星期幾⋯⋯ 原來不知不覺佢已經憑間條顏色認得某些底褲仔係屬星期幾。

之後每次著我會認真啲略解釋係乜意思,其實係難,所以再之後每日俾佢著返相對星期幾既底褲仔,咁樣好似比較容易明。

當時我只係覺得幾好玩,每日沖涼小豬都好期待問:「今日星期幾啊?」同埋佢話比較中意呢啲底褲仔!所以每次有得著都好開心。但我冇乜期待佢會明到,最多咪記得曬星期幾既名稱。同時又覺得,英文比較難,所以也有教中文。(但我覺得佢似乎冇特別傾向學中文版,兩樣進展差唔多。)

Surprisingly,不出一個月佢已經明白到「一星期」呢個 concept;星期幾,中英都識。例如會明,爸爸星期一至五要返工,星期六、日唔使。平時又會好中意提今日係星期幾,聽日又係星期幾。

後來更發現佢知道每條底褲仔既間條和車子既顏色。(但其實都係一個星期著一次!之前更少。)佢一望就知條底褲係星期幾。(我完全記唔到!)

又一次提醒我,唔好睇小小孩子既學習能力!

〔2Y9M〕

Wednesday, February 10, 2016

今晚食乜餸

就來煮好飯,小豬走來問我:「媽媽今晚食乜啊?」

「嗯,你估下?」

「係咪叉燒?」

「下你點知㗎?」

「因為我聞到啲叉燒味啊嘛!」

今晚既叉燒

毛巾



小豬望著(上圖)毛巾:「媽媽毛巾有啲唔同左⋯⋯」


因為我平時是這樣擺的。


#係我個仔無誤

Tuesday, February 2, 2016

Lake Merced。第一次。


第一次帶小豬到 Lake Merced。


好開心。有小徑,有「碼頭」,有「沙灘」,有大石頭,有好多雀仔和鴨子。

在「沙灘」,小豬說了幾次:「要[用沙]整啲嘢⋯⋯」

企圖爬上岸邊的大石頭上,沒成功,就坐在上面。石頭上滿是青苔。亞媽內心其實在呼喊:「好髒啊~~」但外面很鼓勵這個手腳不太靈活的兒子爬多些,亂搞多些⋯⋯ 

(有潔癖和OCD的人,做人父母,有另一層挑戰是常人不能理解到的⋯⋯)


見到有人在釣魚。小豬見到地下的魚,(其實個嘴巴還在動⋯⋯〔摀眼〕)指著說:「條魚暈左⋯⋯」亞媽我也不忍心告訴他實情,快快離開⋯⋯


執到個好靚的松果,話要送給爸爸媽媽(?),但要返到屋企先送(?),一直拿著返到屋企然後話送給我。(!)

+

其實這個湖很近我們家,(不用五分鐘車程吧!)比我們平時去的那個湖近好多。不過平時去的那個在公園裡面,細細個比較好行和多野睇。這個,是真的很大的湖,比較郊外,wild一點。一直沒有來是不肯定適不適合玩;不肯定可以見到幾多小動物。不過見小豬很 enjoy;個沙灘仔話唔定夏天真的可以玩泥沙⋯⋯ 近近地,其實可以多點來。