Saturday, February 27, 2016

亞仔你諗乜啊?

唔知我個仔想點。前兩日六點就醒,今日五點!!但佢冇叫我,就咁坐喺床仔度⋯⋯

其實我唔肯定佢幾時醒,只不過我五點醒左見到佢坐左喺度⋯⋯ 之後我瞓下醒下,最後一次六點半仲係見佢同一個位置⋯⋯ 跟住七點三就見到佢瞓左!一直瞓到九點!!

前日六點醒左有叫我。我一入去就話要睇本書,之後就唱歌再放返落床仔。但當然冇瞓,七點又叫我。

昨日佢六點醒左但冇(乜點)叫我,一直企喺度到七點先大聲叫。(佢每次醒左都會企喺同一個位置望住窗外。但係有落曬窗簾的。)

(唔知係唔係我晚晚都提醒佢:你天光先好叫媽媽;醒左天未光唔好叫媽媽喔⋯⋯)

佢以前未試過咁早醒囉,仲要連續幾日!!好怕係個 trend 啊!好驚。雖然唔使理佢,但其實自己都瞓得唔好,好攰啊。對佢來講都唔好,佢已經唔係早瞓嗰種,nap 得又少甚至唔 nap。(前兩日都冇 nap 啊!)但佢真係好似唔使瞓。而家佢越來越多嘢諗,可能咁所以瞓唔到⋯⋯

(不過我今日好開心,男人帶左個仔出去,我攤喺間床到而家(差唔多十一點),所以有時間打呢段嘢⋯⋯ 嘿。)

No comments:

Post a Comment