Thursday, March 10, 2016

餓佢一餐唔會死

見到有媽媽寫,個仔唔食就冇得食,餓一餐唔會死⋯⋯

嗯,我都好想講啲咁有型(!)既嘢。我都確實好同意;我之前都諗住係咁做⋯⋯ 但。現實就係,原來呢個世上真係有唔使食嘢既仙童(?)!!你以為餓佢一餐下餐就食多啲?(餓幾餐都唔會咪講一餐半餐。)你以為唔俾佢食佢就跪地求饒下次唔敢?(唔好天真,唔使食更加開心。)

我諗,做得出既媽媽應該冇乜點為過小孩食嘢方面操過心吧?!個小朋友本身就係好中意食嘢吧?!小朋友既成長線唔係低於 5 percentile 吧?

我家就係有個唔使食嘢既仙童。自問一直都好盡責地煮嘢俾佢食。頭兩年幾,佢就係可食可唔食,有時連續幾日食幾啖就算。唔需要你唔俾佢食,自然唔會食。

第一年嘔左好多血,歲半後叫自己放鬆,由得佢。成長線試過低到 1 percentile。谷底係,食一啖就走左去玩。那時既底線就係:我唔會追住佢來餵。(不過如果有人咁做,而家既我都唔會 judge 你。因為小豬既情況都唔算太差,佢只係太貪玩,唔係討厭食嘢。但我真係唔擔保如果好差好差既情況下我唔會行呢步。)

托賴,係三個月前佢既情況開始改善,到而家尚算可以。咁唔可以同中意食嘢乜都食既小朋友比,但至少食量係以前既兩倍。但佢係幾乎乜生果都唔肯食,試都唔肯試。不過我要知足。

下個月就三歲既小豬還著緊12-18M既衣服。睇樣似兩歲。我覺得自己算係睇得好開,冇話點擔心。不過而家諗返,覺得可能應該早啲令佢食多啲,而唔係乜鬼「餓下佢唔會死」。係,係唔會死,但可能因此影響左成長。但,我係喜歡向前望的人。


#勉勵所有養有仙童的媽媽

No comments:

Post a Comment