Friday, December 29, 2017

學踩單車,第一次



小豬開始學踩單車了!!他不讓人扶⋯⋯


#4Y8M
#決定不用輔助輪
#好辛苦地研究了很久才決定買這部單車
#好滿意啊型到爆
#我叫男人買返部同個仔一齊踩囉

Wednesday, December 27, 2017

《The Little Reindeer》



介紹多本聖誕繪本:今年九月才出版的《The Little Reindeer》by Nicola Killen。



講真,這本純粹被它的 charcoal + red color scheme 吸引了。在 Target 見到跟小豬看了一次;但圖書館還未有貨;我又念念不忘,不想等到下年,就買了!



真的很美的繪本。很值得收藏呀!(故事也可愛的。哈。)

Tuesday, December 26, 2017

True Love


聖誕夜,跟小豬躺在床上,我說:「咦今日係 first day of Christmas 喔!」小豬馬上彈起身:「咁我地要唱 first day of Christmas 啊!」


唱了第一段:
On the first day of Christmas, my true love gave to me… a partridge in a pear tree.

小豬:「聽日我地唱 second day of Christmas!」


躺下,我擁著他,他問:「媽媽,邊個係你既 true love 啊?」

我:「嗯⋯⋯ 爸爸囉。」

小豬:「啊~~ 唔係我咩?」

我:「哦⋯⋯ 你想做媽媽既 true love 啊?」

小豬(有啲失落):「嗯⋯⋯ 唔係⋯⋯」

我:「你想做咪做囉⋯⋯ 你都可以做媽媽既 true love 㗎。」

小豬:「哦,咁即係你有兩個 true loves?」

我:「係啊,得唔得?」

小豬:「得。」

我:「你想唔想做媽媽既 true love 㗎?」

小豬:「想。」

💓💓💓💓💓

#一定是前世的真愛


這本書是我十一月份時在圖書館的新書架見到的。當時見到封面繪畫幾可愛,小豬喜歡數字,就借了。(因為我挺節日冷感)本身以為本書幾無聊的,誰知小豬一看就馬上大愛,迅速就識唱⋯⋯ 然後日又唱夜又唱,更自改歌詞。這個月來我發夢也唱著這首歌。

後來借了另外三本「the 12 days of Christmas」,小豬始終都係最愛呢本,就買了!

#4Y8M
#本書的精髓在於媽媽的表情
#其實唔係好知小豬對TrueLove明幾多


Monday, December 18, 2017

五份工作

最近小豬很喜歡說,他長大後會有五份工作。

星期一:做 policeman。
星期二:做 fire fighter。
星期三:做起屋。
星期四:做整路。
星期五:做 chef。


#圖為幫手做朱古力香蕉蛋糕
#4Y7M

Monday, December 11, 2017

Paw Patrol 迷


這幾個月小豬一直迷著 Paw Patrol。亞媽雖有千萬個不情願,但都應承了聖誕會送 Paw Patrol 的玩具。同時也很佩服他這幾個月來每次見到 Paw Patrol 的玩具都沒有扭買。(有要求過但經過亞媽一番唇舌都唔會買。)

前一排帶他去 Target,看看有甚麼 Paw Patrol 的玩具他喜歡。

事實是,他甚麼也喜歡。後來選了兩個價錢比較合宜的。當時我見他望著玩具的眼神,興奮的程度,我以為今次要買一個返去先⋯⋯ 但當我話要等到聖誕,他說可以。

之後我們去看書,他一眼就眇到這本 Paw Patrol stickerbook,拿著翻呀翻,說好中意。我說,中意就買啦。

他說:媽媽我真係好中意啊,但如果你話唔可以買,唔買我都ok啊。

那刻,我的心融化了。

#4Y7M

Thursday, December 7, 2017

變化


晚餐:熊貓飯糰(裡面藏有紫菜和芝麻),芝麻菠菜(小豬大愛),燒汁雞排,炒紹菜紅蘿蔔,洋蔥雞湯。甜品:朱古力香蕉蛋糕

用碗食了一段時間,小豬要求分開食物,所以又用返這個 tray 啦。當初有刻想送人了,好在沒有。

小朋友成日都變啊!



#一覺得沒用的就馬上想送人或捐了
#如果我細個都有咁豐富的食物就好啦
#4Y7M

Tuesday, December 5, 2017

第一次溜冰


今日小豬同朋友仔去溜冰!!第一次!

媽媽最後一次玩應該係⋯⋯ 幾乎30年前!〔嚇!〕當然係完全唔識,唔敢離開牆邊。但亞仔有自己溜溜喔。

+

當小朋友第一次去嘗試新嘢時,亞媽內心免不了有點澎拜(?!):亞仔又長大左啲啦~~ 幾年就咁過去了~~ 我那個小 baby 那去了~~


#4Y7M

Friday, December 1, 2017

蚯蚓



過去一個月下了好幾場雨。小孩們在學校挖起蚯蚓來。

一向有潔癖傾向的小豬,這個星期終於跟我說他有參與,還用手碰蚯蚓喔!

#不枉媽媽交咁貴的學費
#4Y7M
#圖片從學校IG抓來的

Wednesday, November 15, 2017

小豬大廚


荒廢了一段時間的 play kitchen,小豬今個月忽然廚師上身。(真的稱自己係乜乜廚師。)(乜乜=他的名字)

每日!我煮飯時他也開工,每日都煮好多嘢給我吃。

亞媽煮飯已經很忙,但還要不停地吃吃吃。還要不停回答他我想吃些甚麼⋯⋯ 〔呼〕

亞媽表示很累。但每次吃時都要表示十分好味,好中意。(他會很認真地看著我吃⋯⋯)

圖中只是一日的食物。他對食物擺設,有要求的喔。(下面細碟那些是 dessert。)


#4Y6M
#PlayKitchen真的超好玩
#每個大小朋友來我家都被吸左去玩

Thursday, November 9, 2017

綠色 Play Dough


今日拿 play dough 出來玩,好硬啊,唔玩得啦。我跟小豬說,整過啲新既畀你啦,白色得唔得啊?(白色最容易⋯⋯)

但他說想要綠色喔!現在最喜歡綠色的啊。(媽媽沒影響他⋯⋯)

我想,綠色?怎麼可以做綠色的呢?⋯⋯

嗯,用了我那昂貴的抹茶粉⋯⋯ 媽呀~~ 〔掩臉〕

但連小豬都說,啲 play dough 好好味啊。然後扮食。



#4Y6M

Friday, November 3, 2017

《Little Fox in the Forest》



一看就愛上的無字繪本。


女孩帶了從小陪伴她長大的心愛狐狸玩偶返學校「show and tell」。放學後到 playground 玩時,一不留神狐狸玩偶被一隻小狐狸拿走了,直奔森林。


小女孩嚇壞了馬上追上去。


森林是另一個美麗的動物世界。


找了很久,問了好多小動物;最終熊先生帶了她去小狐狸的家⋯⋯ 當小女孩見到小狐狸時,他們會怎麼做呢?

最後那幕蠻感動的。

是一個關於分享與友情的溫馨故事。特別喜歡故事由一個「人類世界」跳進一個「動物世界」,一切又是那麼的理所當然,呈現出人類和動物(可以)相處的和諧。

+

這書是 Stepanie Graegin 的處女作。不過之前她有跟好些作家合作繪畫。她是我最近喜歡上的繪畫家。值得留意的有《The Lost Gift》(聖誕書,之前有介紹過),《Super Manny》和《Hector Collector》。

#適合三歲以上

Wednesday, October 25, 2017

感動。

週末跟舊學校同學們相聚。回來後我跟小豬說:「你有冇有留意到C的手臂有乜唔同?」

小豬:「唔知啊⋯⋯」

我:「佢著手有個 cast 啊!」

小豬:「點解啊?」

我:「因為佢喺學校玩時跌親,隻手有啲骨斷左,要裝個 cast⋯⋯」

這個時候我見到小豬眼眶紅了⋯⋯ 嚇了我一下,連忙說:「唔怕,裝左 cast 就冇事啦。佢而家冇事啦。你睇佢今日跑來跑去,都冇問題啦。」

見他的樣還是怪怪的⋯⋯

我:「你做乜啊?」

小豬:「唔知啊⋯⋯」

我:「係咪覺得有啲傷心?」

小豬:「係啊⋯⋯」

我:「唔緊要。C冇事。佢唔痛啦。你唔洗擔心。」

+

有點感動。

+

如果你問我,想個仔將來成為怎樣的人?

答案一定是:善良的人。

+

小豬今日第一次踩單車。


Tuesday, October 24, 2017

十萬個為甚麼。Cafe Corner。

沖涼時個仔忽然同我講:「媽媽我都唔知點解我個口成日講點解點解點解⋯⋯」

〔狂笑〕

(係囉,亞媽都想知!)

沒錯,小豬已經進入「十萬個為甚麼」期。係真的任何嘢都會問點解。但無論你點答,佢都可以帶你落去個「點解無底坑」裏,哪裡有無盡的「點解」。

+

圖:這盒絕版被炒高價的「cafe corner」因為我男人一時手痕開了幾包而唔見左唔知幾多錢。(價錢好隨時可以賣,我地對佢沒感情的!)一直擺在車房。最近小豬不時叫我給他玩。我不肯啊。但週末就有人拿出來給他玩囉。哼。


#4Y6M
#十萬個為甚麼

Thursday, October 19, 2017

「打小孩」

昨日在 POPA channel 有篇文,其中一個「提倡用打來管教小孩」的留言完全令我O嘴。

這人說,當小孩 lur 地時係打到佢起身為止!!唔。係。一。下。!!小孩沒有兩歲半。

)))))天 啊 (((((

+

我好想寫點甚麼但我估我都係冇時間(重點冇精力)寫了。只想講,別人點教小孩我唔會理,但你打小孩,如果畀我見到,我很難唔出手。

這留言奇人還表示,「打小孩」唔係「暴力」。

WTF。

+

我係,走不打不罵不罰路線的。小兒四歲有半,未見佢畀我「寵壞」。三至四歲係情緒爆發期,最高峰每日應該發脾氣超過十次。小孩,就係咁㗎啦。佢識得控制自己的情緒佢就唔一個小孩。(可惜好多大人都未學識控制情緒但會要求小孩識。)

+

Anyhow,見到友寫左,耶~~ 


附上幾張 quotes 算啦。




Friday, October 13, 2017

加州山火

睇到呢個真的好難過。我從小就係 Snoopy fan。好記得,Mr. Schulz 過世的時候我在香港,那時都難過了好一會。

+

昨晚跟香港的友說,這裡山火燒得好嚴重。給她看照片,她很驚訝個嚴重情況。

係,係好嚴重,燒左幾千間屋。燒到,平地一遍。

+

正好一年前我們就去那邊度假,很喜歡那個日本庭園式的旅店。一定會再去。

昨日上他們網站,知道沒事。好在。

+

燒的地方離三藩市約一個小時車程,算是三藩市人的「後院」。週末短度假,即日來回,都很方便。

燒不是一個地方,係好多不同地方,不同市鎮。火源也有很多個,所以一直很難控制火勢。但剛剛聽到可以控制到某小部分了。

+

這些天空氣都極差,可以聞到煙味。多數留在室內。今日終於見到藍天。

+

今年的災難也太多了吧。

有時覺得最好的應對方式就係唔去諗佢。但有時靜下來,真的會很難過。世上正在受苦的人真多,而我可以做的多麼微小。

+

然後你會發覺自己係咁既幸福,直到下一個災難可能會來到你身上。

這幾天在想,三藩市地震應該不遠了吧?係時候真的要做好準備了。

Tuesday, October 10, 2017

《對話兩則》

小豬:媽媽我既心好容易爛㗎。

我:吓?點解啊?

小豬:因為我既心係玻璃做㗎。

我:⋯⋯ 

+

小豬:媽媽你係咪真係中意我㗎?

我:媽媽梗係中意你啦。

小豬:咁你每日要多啲 kiss kiss 同埋 hug hug 我先得啊。咁我先知你真係中意我嘛。

我:我每日已經畀好多 kiss kiss 同 hug hug 你啦。媽媽最中意就係 kiss kiss 同 hug hug 你。

#4Y5M

Sunday, October 8, 2017

是日對話

沖涼時小豬跟我說:「媽媽我都中意自己㗎。」

我:「係?點解啊?」

小豬:「因為 Miss Rachel 問嗰時我有舉手。」

我:「噢,係咩⋯⋯ Miss Rachel 係點問㗎?」

小豬:「佢問『Do you love yourself?』跟住我有舉手。」

我:「嗯,係啊,我哋個個都要愛自己。」

小豬:「點解啊?」

我:「因為媽媽覺得,我哋要首先學識點樣愛自己先識得點樣愛別人囉。連自己都唔愛,點愛別人啊?」

小豬:「媽媽你知唔知我最愛既係你?」

我:「我知啊。你成日都同媽媽講,媽媽梗係知啦。」

小豬:「我真係好中意你。」

我:「Thank you。媽媽都係最愛最中意你。點解你最愛媽媽既?」

小豬:「因為我係你既 tummy 出世囉⋯⋯ 所以我最愛你。」(第一次聽,我都有啲 surprised。)

我:「吓咁㗎。仲有冇第二啲原因啊?」

小豬:「冇啦,係你 tummy 出世就係個原因啦⋯⋯」

我:「咁有冇啲乜嘢係媽媽幫你做令你好中意媽媽㗎?」

小豬:「因為媽媽煮嘢畀我食。」

我:「哦⋯⋯ 仲有冇啊?」

小豬:「冇啦。」

Friday, October 6, 2017

在 Papyrus,有兩兄妹想買一啲 Halloween 既嘢。

嫲嫲見到好大反應:「吓,呢啲嘢唔可以買㗎。爸爸唔中意。」

兩兄妹個樣好 puzzled。

嫲嫲繼續:「呢啲係鬼唻㗎嘛,爸爸唔中意㗎。死都唔可以講,呢啲更加唔可以啦。爸爸媽媽唔中意㗎。佢地唔中意 Halloween 既嘢,係鬼唻㗎嘛,唔可以買㗎,不如買過第二啲嘢啦⋯⋯」

兩兄妹繼續好 puzzled⋯⋯ 

跟住嫲嫲不停話爸爸媽媽會唔中意㗎,你擺番低啦⋯⋯ 跟住幫佢地擺低⋯⋯

我(在隔離的 aisle)收起碌來碌去的雙眼,望下,好似係卡片⋯⋯ 

#點解死唔可以講呢下我唔明
#個仔今年終於非常有意識地話Halloween要扮啲嘢

Monday, October 2, 2017

「唔好話我」

叫小豬做啲嘢;第三聲時略帶少少唔耐煩。

小豬馬上不滿:「你唔好話我啦!」

我:「吓?咁都叫話你?」

我想了想,說:「媽媽好聲好氣你都話媽媽話你,你知唔知話你就唔係咁既語氣啦?你知唔知好多其他媽媽係點話佢地既小朋友㗎?(!) 係會好惡咁鬧佢地⋯⋯」

小豬打斷我:「你都唔惡既⋯⋯」

噢,咁又估不到佢會咁講⋯⋯ 我:「噢,媽媽唔惡㗎?」

小豬:「媽媽一啲都唔惡⋯⋯」

我:「嗯,你知就好啦⋯⋯ 你知唔知有啲媽媽係會打佢地既小朋友㗎?」

小豬面露困惑:「吓?點解啊?」

(亞媽我都想知⋯⋯)

我:「嗯,我都唔知啊⋯⋯ 如果媽媽打你你點?」

小豬:「我會喊,會不停咁喊,我唔會停⋯⋯」

我:「你會唔會好傷心?」

小豬:「會啊⋯⋯ 因為我唔知你係咪仲中意我⋯⋯」

佢既面色已經開始唔係咁好,有啲驚⋯⋯

我:「如果媽媽打你就係唔中意你㗎啦?」

小豬抱住我的腿就快要喊:「如果你打我我會唔知你係咪中意我㗎啦⋯⋯」

馬上呵返⋯⋯ 變態對話到此為止。

+

因為看了某網紅媽媽講吼小朋友好似係天經地義的事⋯⋯ 再暗示(?)其實揍小孩也是等閒事⋯⋯ 然後總有一堆人衝出來和應,對對對,小孩就是欠揍的之類⋯⋯

我覺得好可怕,才忽然有這段對話。

Wednesday, September 20, 2017

姓名

昨晚小豬在嘗試睡覺途中問了我一個好高深的問題:

「媽媽,點解你既 last name 係 Lee,但你唔係姓李既?」

黑暗中我:「吓⋯⋯」

佢又繼續:「你個名明明係王小雲,都唔係李既⋯⋯」

#姓和名當然用假的啦
#佢最中意要睡覺時諗好多嘢
#咁又點睡到啊
#佢而家都係唔肯咪埋眼睡覺

Monday, September 11, 2017

Mars Talk

以下是從我男人的FB搬過來的哈哈:

+ + +

(我=我男人)

一邊做大事,一邊研究天文...

小豬 : 呢架 rocket 應該去緊 Mars。

我 : 不過呢... Mars 咩都冇,得啲石頭...

小豬 : 唔係呀,仲有 alien!

我 : 你點知?Mars 好遠,冇人去過,都唔知有冇 alien。

小豬 : eh... 我覺得有囉。

我 : 咁你坐 rocket 去睇下啦,但係要坐好耐,要七年先去到㗎。

小豬 : (開始興奮,數手指) 而家 2017 年...2018...2019... 要 2024 年先到呀!

我 : 你 4 歲開始坐,去到 Mars 11 歲,睇完 alien 返 earth 就 18 歲喇!

小豬 : (非常興奮) 係呀,要坐到 18 歲!(忽然語氣一轉) 咁我啲 birthday 點算呀?

我 : 你同其他 astronaut 一齊開 party 囉。

小豬 : 咁姨姨同契媽會唔會嚟?

我 : 唔會喇,你喺 rocket 度 facetime 佢地囉。

小豬 : 哦... 咁我唔去 Mars 喇。

+ + +

#最愛姨姨和契媽
#4Y4M
#我男人極少會貼呢啲所以要留念呀

Wednesday, September 6, 2017

Swinging


今日放學後到 Lake Merced,很久沒去了。Heat wave 過後天氣很涼快;在湖邊跟鴨子們 hang out 了很久。

小豬不停地 swing 來 swing 去。

很喜歡這張照片,感覺它說出我的育兒理念吧:雖然心裡有懼怕,但請給孩子自由,相信他。


#愛
#4Y4M

Tuesday, September 5, 2017

第一顆收成


前一排在超市見到呢盤 strawberry 好靚忍唔住手買左,心諗,就算冇 strawberries,當盤栽都唔錯,啲葉有紅有綠,粉紅的小花,都幾靚。之後一直有長出果實,但長不大。

這顆是第一顆長大還看著它慢慢成熟的。那種心情確實有點興奮。

叫小豬把它摘下來但他不肯食。我小心把它切開兩邊,慢慢品嚐。都幾好味㗎!

Monday, September 4, 2017

Coi (II)


週末又去了 Coi 晚餐。跟三年前食的完全不一樣。服務比以前更 formal,可以話「更好」。但我還是比較喜歡隨和些的服務。還記得上次的 waiter,覺得他很似我們在巴黎遇到的一個超 friendly 的 waiter⋯⋯ (你知法國的人都幾「有性格」的,所以那個 waiter 很突出,留下深刻印象。)很陽光,能帶給快樂的那種⋯⋯ (扯遠了⋯⋯)

Anyway,今次起碼有十個 waiters 來「服侍」過我們。我起身去洗手間,已經有人快我一步開定門給我⋯⋯ 這個,還是頭一次,感覺有點不需要呢。

不是常去這種餐館,要記下食啲乜。

+
menu:

MUSSEL CANNOLI
bacon, parsley, garlic, lemon

SHIGOKU OYSTER
manila clam, sea lettuce, black truffle

LOUP DE MER
honeydew, caviar, lime

DUNGENESS CRAB
grapefruit, champagne, bay leaf

STUFFED SHELLS
bone marrow, romaine, rosemary

TURBOT
root vegetables, beurre cancalaise

BLACK BASS
spot prawn, finocchiona, cucumber

FINES HERBES SORBET
mara des bois, elderflower

PRALINE
cremeux, mandarin

MIGNARDISES

+

 

食完上面九道菜後,他們端了個 chocolate mousse cake 出來,因為是男人的生日嘛。那時其實已經飽到不行,但以為是最後的了所以也勉強幹了⋯⋯(!)

之後,你可以想像當他們端 mignardises 出來時,我有多震驚嗎?!Mignardises 是用幾個盒子裝著,來到打開擺好。有點變魔術的感覺哈哈。但個 waiter 見到我個樣傻左,也很醒目地說:「食唔到我可以幫你裝起佢。」




最後值得提起是這個 bread and butter!中段端出來的,個 butter 刨成絲帶狀然後變成一座 art sculpture!!(我屋企都是食這隻 butter。哈哈。)個麵包很好食但我克制自己只食了3/4。

很滿意的一餐;沒道菜都很美很好味。有些都不捨得吃呢。只是今個月要慳啲食來彌補一下囉⋯⋯ 哈哈。

Friday, September 1, 2017

熱潮


今日三藩市破紀錄的熱,達到三個數字位(40C+)啊~~ (但兩天前才得60F(15C)!)

想講的是,咪講冷氣,我哋屋企係連風扇都冇把!!(紙扇都冇啊!)但!!非常神奇地,我哋冇熱死。

早上時,我在家很涼爽,去接仔時一落車好驚嚇:「發生甚麼事何解咁熱?」原來已經100F了!!

外出午餐成身汗,因為沒冷氣嘛。之後馬上回家「避暑」!但去到下午四點,我又開始煮飯,間屋係熱左,但未至於難頂。

我覺得我哋啲屋好神奇!而家講緊100F(40C)喔!!

+

好啦咁熱,晚餐冇人想食熱嘢吧。就做日本冷麵,加些冷菜式。本來諗住簡簡單單但唔知點解搞左咁多出來。〔掩面〕(右下角的是之前剩下的 braised short ribs。)


#咁熱一定要食雪糕啊
#不過都係熱一兩日就收皮啦
#整個八月好似冬天咁其實熱下都好既哈哈

Thursday, August 31, 2017

切切切

對於新學校,小豬最期待的就是可以參與煮嘢食!!

今日一直問我有甚麼可以幫手的;我說可以洗菜啊⋯⋯

「有沒有別的?」他問。

嫌洗菜太簡單嘛?

他有跟我說過在學校切過蔬菜的;好啦就讓他試試吧。

首先讓他切 asparagus,見他能夠勝任,就給他切 bell pepper。我以為 carrot 會太硬他切不來,誰知也可以啊!

我呢,當然要收起我的完美主義,接受他的切法。不過他切得也可以啦。哈哈。

#4Y4M

Tuesday, August 29, 2017

第二日返學

送小豬去到就走得,不用陪。接放學應他要求遲了點去,去到只剩他跟另一個同學仔。(同學仔媽媽跟我一起到。)我問他,是否喜歡最後一個走?他答:「係啊!因為呢度實在太好玩啦~~」

+

嗯,明天開始,送小豬返學這重任可以交翻給男人了。〔跳起〕

(本來小豬說今日可以讓爸爸送的,可惜新買的 car seat 今日才到。當初我以為起碼要送他一個星期嘛⋯⋯)

+

想去年,我陪了他六個星期才讓爸爸送的!!


#一年的分別好大呀
#不用逼小朋友去成長他自己會
#要開始適應我的新生活了
#呵呵

#你冇睇錯今日真的很冷
#圖片由學校提供

體貼

小豬在地上玩,叫我一起。

我坐下來,他馬上緊張地:「媽媽你唔好坐住⋯⋯ 嗯⋯⋯」

跟住走去拿個 cushion 來給我墊著坐:「你咁先會舒服㗎⋯⋯」

#4Y4M
#是有點兒感動

Monday, August 28, 2017

第一日返新學校

小豬今日第一日返新學校了。

一年真的很大分別。一年前第一次返學,我陪了成個月啊!

今日,我在那裡八卦了十來分鐘,見他已經很投入地在玩,就問他媽媽可以走了嗎?

他望了我一眼(似乎是,媽媽你怎麼還未走⋯⋯):可以啊。

+

早了半小時去接他,後來待了20分鐘才離開。但離開時他卻跟我說:媽媽你聽日唔好咁早來接我啦。呢度好好玩啊我想玩耐啲~~

+

問他,有沒有想媽媽?

「冇啊⋯⋯ 我掛住玩⋯⋯」

+

以前呀,日日都話想媽媽的⋯⋯


#4Y4M
#大個仔囉
#圖文不符

Tuesday, August 22, 2017

離別


小豬最愛的同學仔R今日最後一日返現學校,呢兩日都叫左佢過來我地屋企玩一、兩個鐘。

今日離別後小豬話好唔捨得佢,唔想佢走。我話九月又可以見啦,佢話,咁係咪九月一號啊?



#R在小豬心中的地位僅次於爸媽
#小豬最近好迷地圖但R應該沒甚麼興趣
#小豬下星期返新學校了
#好唔捨得現學校呀
#我快哭了

Monday, August 21, 2017

小童真言

「爸爸呢個咩來㗎?」

小豬指著男人的肚⋯⋯ (他沒理由不知喔⋯⋯)

「我既 tummy 囉⋯⋯」男人笑著答。

「但好似有啲大⋯⋯」小豬認真說。

「吓?!唔係啊~~ 咪又係咁~~ 大?邊度有⋯⋯」男人崩潰了⋯⋯

小豬繼續認真 mode:「有大⋯⋯」

我在旁笑翻了:「可能裏面有個 baby⋯⋯」

哇卡卡卡。


#殘忍
#4Y4M

開心

早餐時,小豬忽然問我:「媽媽,你尋日夜晚有冇啲開心啊~~?」

我諗下尋晚做了甚麼特別的⋯⋯ 諗唔到:「吓?點解你咁講啊?」

小豬咪咪嘴笑:「因為你尋晚見到你既爸爸媽媽啊嘛。」

笑。

#旅行返來第一次見公公婆婆
#4Y4M

Thursday, August 17, 2017

與豬約會


外遊回來冰箱甚麼也沒有,母子倆外出午餐。

好像這才是我們第二次單獨外出食嘢。感覺蠻特別的。

現在小豬食嘢還算不錯,不再嘔心瀝血的。

望著他,真的長大了,可以舒舒服服的一起 lunch date 了。

媽媽感觸良多呀。



#苦盡甘來mode
#4Y3M

Friday, July 28, 2017

挑戰一百塊拼圖

小豬前日完成了副之前有一起砌過幾次的100塊的拼圖;昨日就一直雄心壯志地跟我說他要砌多啲100塊的,覺得自己已經「勁」左,可以「upgrade」到100塊了。

我不是太肯定。砌過跟從沒砌過的100塊,很大分別。我跟他說明,100塊需要很多耐性的。(他說我有!)100塊很難的。(他說我想有挑戰。)⋯⋯ 說了一大堆嘢預備好他的心情,因為不想他中途而廢,也不想見他發脾氣⋯⋯

然後才把這盒漂亮的 forest friends 拼圖拿出來給他。(舊年聖誕買的哈哈。)

他一邊砌我一邊預備晚餐。有幾次他有點 stuck,我給了少少提示。(例如樹是打橫還是打棟㗎?因為見他把砌好的樹幹打橫放。)但整體上他是自己砌的,用了約個半鐘。(但其實個時間過得很快。)

砌完他很自豪,一直話自己勁。

老實說,是有點勁喔。

#4Y3M
#有媽媽的砌拼圖基因

Thursday, July 27, 2017

PAW Patrol

家附近新開了間 Target,與小豬去八卦。

有個迷你玩具部。小豬見到 PAW Patrol 的玩具表示想要。

我:「聖誕啦,聖誕買畀你⋯⋯」

小豬:「但我而家想要喔⋯⋯」

我:「哇好貴喔~~」($35)

小豬:「係喔⋯⋯」(這人認為多過$10既嘢都很貴⋯⋯)

我:「太貴啦媽媽冇錢⋯⋯」

小豬定著不語。

($35 的旁邊有件$30的,貴。)我(很不情願的拿起件$13的打算打發他):「一就呢個啦⋯⋯」

小豬:「都有啲貴⋯⋯」拿上手好像不喜歡⋯⋯

我(順勢指著一堆最便宜的,$5!):「咁啊呢啲啦⋯⋯ 你揀一個啦⋯⋯」

他望下摸下拿起看下,也是不滿意⋯⋯ 

我:「嗯⋯⋯ 我覺得都唔靚既⋯⋯」

他好像也同意我,之後就離開了。

+

當時我實在有「得左」的感覺,雖然也有少少內疚。因為小豬是極少極少要求買嘢,應該在五次內。記憶中只有一次是很堅持要買;其他很易打發。

但,是 PAW Patrol 啊!!你知是甚麼嗎?!他們的玩具全是!全是!膠的!!但小豬幾迷佢地。〔嘆氣〕我有曾經睇過佢地啲玩具,買唔落手啊⋯⋯

+

第二日早上,一醒來,小豬就跟我說:「媽媽我仲諗住個 PAW Patrol 啊~~」

我:「唔好諗啦⋯⋯ 都唔靚既⋯⋯」

小豬幽幽地:「但我覺得靚喔⋯⋯」

+

今日(三日後),他又忽然跟我說:「媽媽我真係好想要一個 PAW Patrol 既嘢啊⋯⋯」

我真的有點 surprised 他的堅持,他是從來沒有這樣要求過的。我也軟化落來:「咁啊,好啦,聖誕節買畀你啦。因為只可以生日聖誕買嘢㗎。哪你生日又過左,咁等聖誕啦好唔好?」(!)

小豬:「哦。咁我想要個 tower。」(!)

+

之後 search 下,先知原來係呢舊嘢⋯⋯ 都唔少銀兩⋯⋯ 重點係好大舊啊媽呀~~

祈求上天未來四個月佢會唔再喜歡 PAW Patrol。亞們。


#4Y3M
#好怕膠嘢

Tuesday, July 18, 2017

熱吻


小豬的最喜歡的同學仔R,是熱情男一枚。週日去野餐時捉住小豬不停狂吻。

我見小豬似乎有抗拒,後來就跟他說,我哋唔可以隨便同人嘴嘴 kiss 㗎,如果 R kiss 你嘴嘴你唔中意就要同佢講㗎啦⋯⋯ 

誰知他說:但我中意喔⋯⋯

哦⋯⋯ 冇嘢啦⋯⋯



#好快就會與同學仔分離了唔知會點
#4Y2M

Monday, July 17, 2017

彩虹書


在書店一眼就瞄到這本書,一拿上手就愛上了。設計靚;熊貓可愛;很適合當「擺設書」!(!)

借過好幾本 Jane Cabrera 的書,也買了本,畫風走可愛型。但這本沒可能買的啊~~ 因為兒子已四歲了!!一早已遠離學習顏色的階段⋯⋯

拿著翻了許久還是決定買了⋯⋯ 送給人囉。


#但擺在家幾日有點不捨得送出去
#真係好靚啊~~

Tuesday, July 11, 2017

煮飯小幫手


最近小豬由自己的廚房進攻我的廚房。

說真的,我不是太熱衷「與小孩一起煮」這個 idea。我覺得煮飯都算係一段讓我回下氣的時間;也可以 relax 下。(雖然好多時都是一邊煮一邊應付他⋯⋯)「親子時間」有好多嘢可以做,我不會選一起煮飯囉。

但世事就係,你唔揀佢佢揀你。(?)

以前他只會做些比較簡單的例如搣下豆豆。後來他成為了「量米員」,和幫忙 set table。做了段時間後,有日他忽然跟我說:「媽媽我想幫手煮飯啊~~」

現在他多數負責洗菜。把我切完的蔬菜撥落盤子;再將盤中的蔬菜放進煲裏。落鹽,無論是煮或醃嘢。有時會幫忙打蛋,搞肉碎⋯⋯

開始我以為他玩玩下,誰知這樣好似已經維持了幾個星期。開始我覺得有點兒煩的⋯⋯ 哈,但其實習慣了也 okay,他真的很認真地做。

也好,趁機可以讓他知道,煮一頓飯不是那麼簡單,都幾辛苦㗎。哈。

#4Y2M

Wednesday, July 5, 2017

《Green Eggs and Ham》


上星期有日放學回來,小豬跟我說:「哇我好攰啊~~」

從來沒聽過他咁講,我很好奇:「吓~ 你喺學校做左乜啊?」

「我喺學校讀左成本書啊!」

吓?!

經了解後,原來係讀了一本叫《Green Eggs and Ham》的書給另一位同學仔聽。

我問老師是否真。老師話係啊,雖然見他每翻一頁都嘆了口氣,但有堅持讀完整本書。同學仔也很有耐性聽完!

我沒看過這本書,因我知 Dr Seuss 的書偏長很多字,所以我還未給這類書小豬看。我們看的書多數很少字的。

然後今日到圖書館,找來這本書,我問小豬可以讀給我聽嗎,他說可以。(第一次肯讀書給媽媽聽!!)哇真的很長啊~~ 62頁啊~~ 好多字~~ 聽到我都很攰~~

+

不能不讚嘆小朋友的學習能力啊!十個月前他可是一句英文都不會說。他也是到今年才開始允許我讀英文書給他聽;我們不會對他說英文。學校也不會教認字。他們是連甚麼 circle time,story time 都沒有的,真的全由得小朋友喜歡做甚麼就做甚麼。(但如果小朋友想,老師是會讀書給他們聽,小朋友也可以隨意拿書看。)

又或者,小朋友就是在玩樂的環境下更容易吸收各類知識吧!

+

有借其他 Dr Seuss 的書回家,睡前讀了一本給小豬,很後悔借了。真的讀到斷氣都未讀完啊媽呀~~

#我還是喜歡那些每頁得一行字的書
#4Y2M