Tuesday, January 31, 2017

痴線

當見到一個痴線既人做痴線既嘢,我唔會意外,因為呢啲係「正常」,大佬,佢有病㗎嘛。

意外既係:點。解。當。初。有。人。會。支。持。一。個。痴。線。既。人?如果冇嗰啲人,痴線既人唔會病發得咁嚴重。

好啦,病發啦,但點解佢身邊既人唔帶佢去睇醫生,反而陪佢一齊癲?呢啲人先恐怖啊。


#呢十日過得好辛苦啊幾時到四年後
#呢個世界痴線既人實在太多

昨日經過 Nordstrom 見到呢個牌我同小豬講:「咦呢度寫住『新年好』啊~~」

小豬跟住話:「媽媽嗰度有個『子』字啊⋯⋯」

我正想話,邊度有個「子」字啊⋯⋯ 抬頭再望清楚:「係喔,係有個『子』字喔。你點知㗎?」

跟住佢背有「子」字既三字經畀我聽,(我唔記得佢背乜啦⋯⋯):「係嗰個『子』字啊媽媽。」



#我冇教過佢啊
#3Y9M

Monday, January 30, 2017

是日午餐



好耐沒貼過食物相了。是日午餐小豬食三文魚、小西蘭花(?)(broccolini)、紅蘿蔔飯;加甜椒和湯。


#現在小豬食嘢多左面豬馬上漲返少少
#甜椒控

Thursday, January 26, 2017

駕車中與豬對話

(一)

我:「Baby 你諗緊乜嘢啊?」

小豬:「冇啊⋯⋯ 我聽緊歌之嘛⋯⋯」

我:「但你個樣好似諗緊好多嘢咁喔⋯⋯」

小豬:「唔係啊,我個樣係咁㗎啦⋯⋯」

我:「哦,咁㗎⋯⋯」


+


(二)

我:「Baby 你做乜嘢啊?發緊吽竇啊?」

小豬郁都唔郁冇表情:「我瞓緊覺啊⋯⋯」

我:「吓?!但你對眼打開左喔⋯⋯」

小豬:「因為我係條魚唻㗎嘛⋯⋯」

我:「哦⋯⋯⋯⋯⋯⋯⋯」


(注:有本書講魚係打開眼瞓覺的。)

Wednesday, January 25, 2017

Scooter。竹林。


昨日去植物公園,小豬說想踩 scooter,就帶埋去踩。植物公園有好多斜坡,小豬好大膽直衝落去。看得我都心驚驚。好快呀~~

因為他一直都是踩得很慢,也不算踩得超好那種,所以一直都沒有帶頭盔,就算跌低也沒甚麼。但昨天這樣衝落斜坡如果跌低都可以好傷啊⋯⋯ 我唯有一手扶住個 scooter 跟著跑⋯⋯ 累死我啦~~

小豬似乎比之前大膽左好多,落坡時居然好興奮。以前明明不敢的。所以都開心他的轉變。

+

在植物公園亂行 scooting,忽然發現一片小竹林呀~~~ 我好中意竹林呀~~~ 行在其中馬上幻想自己在日本⋯⋯(!)

+

好想去看 magnolias 啊~~ 但可能落了幾場大雨,只見到好少。

Tuesday, January 24, 2017

摸摸蝴蝶

上個星期去 Academy of Sciences 的 Rain Forest 看蝴蝶。可能冬天很少蝴蝶,但第一次見有蝴蝶樣本供人摸。

開始小豬不敢摸的,但我試給他看;也有其他小朋友也拿上手,他才感嘗試。開始拿個小小的,之後話要隻大大的 Giant Owl。

+

這些樣本超逼真,小小風就飄起來,像真的會飛。有些小朋友都被忽然會「飛」嚇到。

原來,這些蝴蝶只有約三個星期壽命。死後工作人員會拾起來,供人參看。其實跟活的一樣!

Monday, January 23, 2017

老鼠



小豬說他畫了隻老鼠,幾似喔!


#其他多數係唔知佢畫乜

Sunday, January 22, 2017

經常要 Mission Impossible

今日有人躺在地下扭計哭著嚷嚷:

「媽媽你可唔可以移開呢堵牆啊~~」

#三歲的小怪獸

Saturday, January 21, 2017

Busy 書系列。書店小男孩。

在書店,小豬自己看「Busy 系列」的操作書。

我在附近看書,忽然發現有個七、八歲的小男孩坐在小豬旁邊。

小男孩對小豬看的書很感興趣,不時伸手要玩一份。

面對「intruder」小豬是選擇「ignore」的方式。他沒有推開小男孩但也沒有避;沒有不讓小男孩玩,但自己也沒有停下來。

他們這樣好幾分鐘,小豬看完一本又一本。小男孩跟著小豬看。但其實,有五、六本在旁邊的。

小豬看完就來找我,小男孩茫然地周圍望,見他拿著小豬看完的書,但似乎沒心機看⋯⋯

之後我跟小豬看別的書就沒有太留意那個小男孩。不過都見到他走去看另一個小男孩看甚麼書⋯⋯ 後來也望了我們一會⋯⋯

再後來他媽媽來了,他說他想看書。媽媽說好啊。他從書架上想拿一本書⋯⋯ 但他媽媽說,不要看這些,我給你本好書。

(這時候,男人帶了小豬去廁所,我馬上八卦起來⋯⋯)

我眇左本書一眼,是《Harry Potter》(小說版)。想怎樣?

我好八卦地留意了他們十幾分鐘!!媽媽就非常響亮地讀讀讀;小男孩就毫無表情,東張西望。

我不停想,早知剛剛邀請他跟我們一起看書啦。可憐的孩子。

+

身為媽媽我實在是明白給小孩看「高質素書」的慾望(?),但小孩嘛,他們總對媽媽感厭惡的感興趣。(我的小孩也不例外。)請尊重小孩吧。

我見那小孩,已經是不懂自己去選擇;不懂堅持;不懂拒絕;你話怎樣就怎樣吧。

看得我心酸。希望是我看錯吧。



Busy 書系列。非常好玩的書,我們有兩本,是我最早發現的推拉書;同 Bizzy Bear 相似。小豬常叫我買多些,但因為後來有買 Bizzy bear 和別的推拉書,加起來都好多了。

Monday, January 16, 2017

Poo Poo Talk

陪亞仔睡覺,20分鐘後⋯⋯

小豬:「媽媽我肚痛啊⋯⋯ 」

我:「吓⋯⋯ 咁你想點啊?⋯⋯」

小豬:「我想痾 poo poo 啊⋯⋯」

有一瞬間我以為佢想玩嘢⋯⋯ 但佢病了,都幾努力咁試去瞓⋯⋯ 個樣唔似呃我。

我:「咁好啦,去坐 potty 啦。」

試左一陣乜都無 。我同佢講,如果冇就算啦,要返去瞓覺㗎啦。

小豬:「但我個肚肚仲係痛喔。」

我:「咁唔係肚痛就一定有 poo poo 既⋯⋯」

小豬:「點解既?」

我:「咁有時肚痛會痾 poo poo,有時唔會㗎嘛⋯⋯」

小豬用疑惑既樣問:「但點解既⋯⋯」

我:「咁肚痛未必同痾 poo poo 有關連㗎嘛⋯⋯」

小豬:「點解冇關連既?」

兩隻超級好奇眼睛碌大緊緊盯著我⋯⋯

本來很睏甚有睡意既我馬上醒曬⋯⋯ 忽然察覺到休想隨便打發此人⋯⋯ 個腦馬上以一萬倍馬力運作起來⋯⋯

「嗯⋯⋯ 咁有時哩因為你啲 poo poo 喺個肚肚度想出來,佢哋就搞啊搞啊:『我哋要出來啊我哋要出來啊~~』咁你既肚肚咪痛囉⋯⋯ 但有時哩,可能係第二啲嘢喔⋯⋯」

「第二啲嘢?」小豬打斷我問。

「係啊,可能唔係 poo poo 係第二啲嘢又係搞啊搞啊,咁咪冇 poo poo 出來囉。所以唔係肚痛就一定會有 poo poo 要出來㗎!都唔係啲 poo poo 搞緊既!」

「吓⋯⋯」小豬沈思中。

這個時候佢忽然放左個響屁!

我:「哪~~ 媽媽知係啲乜嘢喺你肚搞下搞下啦!係你啲屁屁啊!See 佢地頭先搞下搞下咪出左來囉。」

小豬:「咁你即係話係啲屁屁喺我個肚肚搞下搞下?」

我:「係啊⋯⋯」

小豬:「但我肚肚仲係痛緊喔⋯⋯」

我:「咁啊⋯⋯ 咁就再試下啦。媽媽幫你再捽捽啦好唔好?」

小豬:「好。」

+

最後都係冇。十五分鐘後願意返去瞓覺。

Sunday, January 15, 2017

手作生日卡



前一排做給友的生日卡。

(顏色配搭上不算很襯,但我材料有限,得這兩隻紙。嘻。)

想講哩,要拍這種文藝氣息的(?)照片還不易呢!那天男人帶了小孩出去溜,我又忽然好有興致地來玩一下⋯⋯ 都用了不少時間左湊右擺,拍了好多次㗎~~ 間中玩下算吧啦⋯⋯ 哈哈。


Saturday, January 14, 2017

第一個 Zentangle


我第一個 zentangle!多年前就一直想「玩」,但生左亞仔後冇呢啲閒情啊⋯⋯ (即係而家有?!)

因為學 brush lettering 在 instagram 發現好多 creative 的人 follow。(呢個 zentangle 係睇一個 video 學返來的。)呢幾個月不但是學 brushing lettering,感覺是把沈睡了的 crafty side 喚醒了。有好多嘢想重新拾起來。又開始同男人說:「嗯我需要一個 craft room 啊!」(好幾年冇提過啦!)哈哈。

Friday, January 13, 2017

第一張生日派對邀請帖

亞仔收到同學仔既生日派對邀請帖。

我有三個選擇:

1)回覆「會參加」
2)問亞仔想唔想去
3)當無事發生過

如果揀第三係咪衰左啲咁呢?!:P

Tuesday, January 10, 2017

不是幸運草

昨天在後院找到兩片四葉心型草。

後來做了些 research,發現其實呢隻草唔係 clover,係 yellow wood sorrel。咁,即係唔係傳說中的「lucky charm」啦。

但冇所謂啦。

+


我一直都以為心型葉草就係 clover,因為十幾年前見到副 jigsaw puzzle,個圖案係滿是心型草,當中有片四葉的,我覺得好靚就買左。個盒係寫住「lucky clover」的,好自然我覺得呢隻心型草就係 clover,四葉就係「lucky charm」。咁我之後就好想搵呢個四心既葉出來!

所以我覺得係唔係「lucky charm」唔係咁重要,重點係我終於搵到多年來搵既嘢!〔淚〕

當我見到佢嗰刻,感覺要停止呼吸,個心要跳出來,超感動,又加有種神聖不可侵犯的感覺。後來在附近又搵到另一片。(有好多人都說通常附近會有多啲,所以如果見到一片就更加留意附近。)

我有摘左夾在書中,遲啲可以再分享成果。

+

想講,一直都以為 clover 唔係正印 clover(!)因為唔係心型,唔靚。所以如果我見到係唔會搵四葉的。Lucky charm 既 clover 其實係圓或橢圓型的。仲要係 white clover 先至係真。

我還是比較喜歡心型的。Wood sorrel 其實也很難有四葉的,我懷疑比 clover 更難!!原來又有一種草極似 clover,但啲葉多數都係四葉的!所以如果見到好多四葉既,就唔係真囉。

+

不久前我有 post 過話搵到幸運草。後來自己再睇返,完全唔係!根本係另一隻草!我想講,呢個就係 classic example of「當你超想得到一樣嘢然後有日會忽然眼盲就算完全唔係嗰回事都可以當係真!」。當日我真係以為係真,後來睇返好唔同喔大佬!重點係我冇摘到!即係內心深深處都其實係知道個真相的!(非常適合引用於「真命天子」呢樣嘢上。)(!)大家引以為鑒吧。(!!)

不過呢,可能就係因為有呢件柒事,我就蒙上天憐憫,終於搵到真正的四葉心型草了!!〔兩行熱淚〕

我已滿足了。

+



真正既 lucky charm 應該係咁。(照片 google 返來。)

Monday, January 9, 2017

看「Golden Globe」後感

大部份戲未聽過;
好多明星未見過;
好多男星留鬍子!
好多女星左乜著成咁?

+

其實主要係想睇 Meryl Streep 的 speech。

因為西岸係遲三個鐘播所以其實大概都知佢講乜⋯⋯

但都忍唔住落淚。好冇用。


#未來四年係咪應該把頭埋在沙堆過

Sunday, January 8, 2017

抹眼淚正確方法⋯⋯

小豬痛哭中,叫我幫佢抹眼淚。

幫佢抹抹抹⋯⋯

佢一手推開我隻手:「張紙巾濕左就唔用得㗎喇嘛⋯⋯」

換張新的⋯⋯

「唔係咁抹啊~~」一手搶了張紙巾:「係咁抹㗎!」

自己示範一次然後畀返我抹。


(−_−;)


#忍笑忍得好辛苦
#我個仔係極品

Thursday, January 5, 2017

問來做乜⋯⋯

陪小豬睡陪了很久。

忽然,小豬說:「咦點解你仲喺度既?你唔走既?」

我:「吓?!我可以走㗎?咁我走啦。」

小豬:「唔可以!如果你走我就跟住你走!」(!)

我:「點解要咁做啊?你要瞓覺唔可以走出去㗎。」

小豬:「因為我中意你啊嘛。我中意你哩你去到邊我就跟你去邊!」

我:=_=;


請問做乜要咁問⋯⋯

Wednesday, January 4, 2017

Usborne《My First Keyboard Book》


呢本 Usborne 的《My First Keyboard Book》幾得意好玩。純粹係媽媽見到就好中意所以買左。其實都買左成年喇,但小豬一直都唔係好吼,只係間中會玩下咁。(唔知係咪佢唔係好夠力㩒。)

但上個月開始佢忽然興趣來了,幾乎每日都見佢攞來彈。又會哼啲曲問我知唔知係乜嘢歌。

本書有以下 nursery rhymes:
Morning
Ode to Joy
Au Chair de la Lune
Round the Mulberry Bush
Row, Row, Row Your Boat
Old MacDonald
Twinkle, Twinkle, Little Star
Three Blind Mice
Frère Jacques



+

好想買埋本《Big Keyboard Book》啊!

+

所以呢,有時買嘢畀小朋友未即刻中意唔緊要。時候到,自然就會玩㗎啦。我覺得小朋友興趣成日都會變,有啲好中意既玩得多都會失去興趣。但可能過一段時間又會中意返。小朋友就係百變的!哈哈。

Tuesday, January 3, 2017

認字

前一排去接小豬時老師忽然跟我說:「Do you know your son can read?」

+

我馬上窒了窒。

咁我知佢認得好多英文字,特別係最近,經常讀啲我唔知佢點會識既字。但其實我哋睇英文書係極少會讀英文的,因為佢只想聽(佢明白到既)中文。平時接觸英文都不算多,所以都冇乜機會 find out 到底佢識幾多英文字。

返學前,佢係一句英文都唔識的。

+

我本身係以為小豬記性好,係「認」得啲字。同埋我以為係認得常見單字。

但老師說,佢唔係淨係認得字,佢係識讀,成句識既。又說佢對 phonic 和字母都很有興趣。小豬的學校是百分百 free play 的,零 academic。所以學校係唔會特別教呢啲。但如果小朋友有興趣,老師會一起當遊戲玩。

+

這個假期,有機會時我都試下小豬到底識幾多字。有些書未睇過,但佢真係識讀好多。

又例如我哋出去食嘢,佢好中意睇餐牌,好多字都識,例如 salad,pasta,pizza,sandwich,chicken,pancakes,waffles⋯⋯

+

這個假期,也發現小豬開始講少少英文。也沒以前那麼抗拒我讀英文(但都要加中文),因為佢最近好中意押韻,(中英都中意,)所以押韻的英文書都愛聽。

+

今日又跟老師講起呢樣嘢,老師說,小豬可以憑讀音識串字,當然是簡單三個字母那種。因為她覺得有些字小豬應該未見過既但佢又識串出來。

+

曾經,我聽過某種說法,不應太早教小朋友認字。所以對於這個發現,開始時有點顧慮,這樣會否對小豬不好。

但學校的說法是,他們也不會主動教小朋友呢啲。但對於小朋友有興趣既嘢,他們會以遊戲的模式去配合。

其實與我一貫的做法雷同,不會主動教佢,但佢有興趣的我會同佢一起探索。不過咁早識咁多字,讀 kindergarten 時咪悶死囉。友說,你都要諗啲對策才好。

(又,小豬學校上年有個小朋友,reading 又係比較 advance,父母要求學校用 flashcard 教佢認字,學校不接受這種教法,後來轉了去讀另一間。所以我知這家學校係唔會刻板式教小朋友的。)

Monday, January 2, 2017

甜爆

幫小豬沖完涼,抹身時,他指著我的衫說:「媽媽你件衫爛左啊⋯⋯」

我:「唔緊要啦,屋企著之嘛,爛少少無所謂啦。」

「嗯。媽媽,不如呢,你用我啲利是錢買過件新既衫啦。」好認真地望著我說。

〔感動〕我:「吓,如果媽媽用左你啲利是錢買衫,咁你就冇曬啲錢嗰喔,啲衫好貴㗎!」

小豬:「要幾多錢啊?媽媽唔緊要,你買啦。」

我:「咁啊,咁你冇曬錢買玩具囉喔。」

小豬:「我已經有好多玩具啦,我唔使再買啦。我啲玩具多到我都唔知玩邊樣好。」

Lands End Hiking


上個星期去了 Lands End hiking。毫無難度的行山徑,沿著海岸線,很美的風景;不時可以見到金門橋;很適合跟小朋友一起行。


行行下,去到一個地方見到好多樓梯,望落去很長沒有盡頭,但小豬堅持要行。約法三章沒有得抱後才落。落到去是 Mile Rock Beach,名符其實就是一個石灘。原來很美呀~~


好多人在那裡疊石頭,小豬也疊埋一份。


望著海也很舒服,連小豬也著迷了,說好靚啊。

(我執左堆石頭回家⋯⋯)

後來行返上去還真的有點累。查返原來有 250 級樓梯,(還是寬寬沒有鋪好那種,)但小豬真的沒有叫抱喔。我還有點 surprised。In fact,全程超過兩個小時,他都是自己行的。雖然他後來也承認很累了。

+

Lands End,在三藩市的最西北邊,在 first settlers 眼中也確是世界的盡頭吧。這裡其實離我們很近,可以隨時來。之前有去過(望下海),但很慚愧,住了幾十年 hiking 還是頭一次。〔反省中〕

如果來三藩市玩,也很值得去呢!那天天氣超好,好多人啊!!

Sunday, January 1, 2017

新年快樂 2017


2016,小豬由一個可愛好玩的小朋友變成一個發脾氣怪獸。

2016,小豬終於敢爬出床仔。然後得償所願不再午睡了;然後半夜跑來我們的床;然後晚晚要我陪睡。(媽媽表示很累啊!)

2016,小豬開始返 preschool 了。

2016,我們終於出國「旅行」了。(雖然只是去探嫲嫲爺爺⋯⋯)(你見我冇乜點提都知係幾咁辛苦⋯⋯)

2016,我忙到癲。然後我決定學英文書法。

2016,發生了我很不願面對的事情。至今我仍未能接受到。未來四年我會冬眠。

+

今日我跟男人說,今個假期我甚麼都沒做到⋯⋯時間去哪了⋯⋯ 他:「因為你都用左來寫字⋯⋯」

好衰㗎。


#好想寫多啲但沒時間呀